មហាជនឃើញស្ថានីយ៏ទូរទស្សន៏ហង្សមាស ជាកន្លែងមួយប្រជុំទៅដោយបុគ្គល បំពេញការងារមានសមត្ថភាពរៀងៗខ្លួន។ ម្ល៉ោះហើយនៅពេលឃើញតារារូបណាមានឱកាសហក់ចូលគឺ រមែងសរសើរ ហើយប្រាកដជាបានល្បីឈ្មោះ។ ជាក់ស្តែង ពៅ ពិសិដ្ឋ តារាប្រុសកំពុងល្បីឈ្មោះស្រាប់តែបង្ហាញតួនាទី ជាពិធីករក្នុងតន្ត្រីផ្សាយផ្ទាល់យ៉ាងក្រឡឺម បង្កអោយចាប់អារម្មណ៏។
ខុសពីពិធីករចំណូលថ្មី នៅក្នុងទ្រនំធំដូចជាហង្សមាសជាដើម ដែលត្រូវបានថ្នាក់ដឹកនាំប្រគល់កម្មវិធីអោយចេញមុខរបៀបស្ទាបស្ទង់ សម្រាប់ពិធីករហង្សមាសថ្មីស្រឡាង លោក ពៅ ពិសិដ្ឋ ប្អូនប្រុសតារាសម្ដែង កញ្ញា ពៅ លីដា បែរជាត្រូវបានហង្សមាសដាក់អោយចេញមុខក្នុងកម្មវិធីធំៗប្រចាំស្ថាប័នតែម្ដង។ លោកត្រូវគេឃើញលេចមុខជាពិធីករ ជាមួយពិធីករ និងពិធីការិនីចាស់វស្សា និងក្ដោបក្ដាប់មិនក្រោម៤កម្មវិធីនោះឡើយ ក្នុងមួយសប្ដាហ៍ ដែលនេះគឺជាតួលេខចេញមុខមិនធម្មតា សម្រាប់ពិធីករចំណូលថ្មីរបស់ហង្សមាស ខណៈដែលលោកគ្រាន់តែជាតារាសម្ដែង មិនមែនជាពិធីករអាជីព។
២ខែចុងក្រោយ តារាសម្ដែង លោក ពៅ ពិសិដ្ឋ លេចមុខយ៉ាងសកម្មក្នុងតំណែងជាពិធីករថ្មីប្រចាំហង្សមាស។ កម្មវិធីដែលលោកចេញមុខ សុទ្ធតែជាកម្មវិធីបន្តផ្ទាល់ និងជាកម្មវិធីដែលចាប់ដៃគូជាតារាល្បីៗ ដូចជា អ្នកនាង គង់ សុជាតិ លោក ជា វិបុល អ្នកនាង ច័ន្ទ កែវនិមល លោក សុខ រ៉ាស៊ី កញ្ញា ថន លក្ខិណា លោក នាង វ៉ាងសាន់ និង កញ្ញា ប៉ែន ស្រីពេជ្រ។ វត្តមានរបស់លោកនៅហង្សមាស គឺជាការឈានឡើងថែមមួយកម្រិតទៀត នៅក្នុងអាជីពជាតារាសិល្បៈរូបនេះ បន្ទាប់ពៅបានក្លាយជាតារាឡើងកូដនៅក្នុងអាជីពជាតារាសម្ដែង និងដើរម៉ូដែល។ អ្វីដែលគួរអោយកត់សម្គាល់ គឺលោក ពៅ ពិសិដ្ឋ មិនធ្លាប់ធ្វើអោយមហាជនចាប់អារម្មណ៍ថា ពូកែអត្ថាធិប្បាយនោះទេ ប៉ុន្តែនៅពេលឡើងឆាកបន្តផ្ទាល់ នៅពេលកាន់ក្បាលមេក្រូ ប៉ះជាពិធីករ ពិធីការិនីឆ្នើមៗ លោកបែរជានិយាយបានល្អ ហើយទាក់ទាញ។ ទេពកោសល្យរស់រវើក ព្រមជាមួយនឹងរូបរាងដ៏សង្ហារផង កាន់តែធ្វើអោយ លោក ពៅ ពិសិដ្ឋ លេចធ្លោ ក្នុងរយៈពេលចុងក្រោយ នៅហង្សមាស។
ប្រភពពីទូរទស្សន៍ហង្សមាស បញ្ជាក់ថា លោកពៅ ពិសិដ្ឋ ត្រូវបានថ្នាក់ដឹកនាំ និងម្ចាស់ស្ពុនស័រ ពេញចិត្តទេពកោសល្យ ក្នុងការអត្ថាធិប្បាយកម្មវិធីដែលលោកចេញមុខកន្លងមកយ៉ាងខ្លាំង ដោយហង្សមាសនឹងគ្រោងផ្ដល់កម្មវិធីអោយលោកចេញមុខ កាន់តែច្រើនទៀតនោះផង។ អ៊ីចឹងហើយទើបតារារូបនេះ កាន់តែមានការកោតសរសើរថា ពិតជាជោគជ័យមិនគួរជឿក្នុងឆ្នាំ២០២០នេះ ដោយសារតែក្នុងការសម្ដែង គឺបានឡើងតំណែងជាតួឯក ដោយរកតែកម្លាំងទទួលការងារមិនបានហើយ ស្រាប់តែមកលេចធ្លោក្នុងអាជីពថ្មី គឺពិធីកររបស់ហង្សមាសបែបនេះទៀត។ យ៉ាងណាមិញ លោក ពៅ ពិសិដ្ឋ ធ្លាប់បានប្រកាសថា លោកមិនចោលការសម្ដែង និង ដើរម៉ូដនោះទេ បើទោះជាលោកជោគជ័យខ្លាំងក្នុងអាជីពថ្មីនៅហង្សមាស។ លោកក៏ត្រូវបានគេបង្ហើបថា នឹងមានឱកាសសម្ដែងជាតួឯកក្នុងរឿងភាគថ្មីរបស់ហង្សមាសផងដែរ បន្ទាប់ពីចូលកាន់តំណែងជាពិធីករហង្សមាសបែបនេះ៕
