បើទោះជាមិនធ្លាប់ជួបគ្នាពីមុន តែតារាឯកស្រីដ៏ផូរផង់រូប មិនបង្ហាញអារម្មណ៏ចម្បែងអ្វីឡើយពេលប៉ះជាមួយនាយគ្រឿន។ នាងរឹតតែពេញចិត្ត ដើម្បីធ្វើអោយល្អ ក្រោយពេលបានឱកាសច្បាមការងារល្អជាមួយតារាកំពុងមានប្រជាប្រិយ។តារាសម្តែងស្រីស្រស់សោភា និងតារាកំប្លែង នាយគ្រឿន បានប៉ះគ្នាលើកដំបូងក្នុងភាពយន្តខ្នាតធំបែបកំប្លែង គឺរឿង “កំពូលអ្នកស៊ើបអង្កេតបែកស្លុយ”។ ជំនួបលើកដំបូងមែន ប៉ុន្តែពួកគេទទួលបានការពេញចិត្តច្រើនពីទស្សនិកជន។
ការបញ្ជាក់នេះធ្វើឡើងក្នុងឱកាសដែលភាពយន្តរបស់ផលិតកម្ម វីស៊ីន( VCINE Production) បានប្រកាសដាក់បញ្ចាំងភាពយន្តនេះជាផ្លូវការកាលពីរាត្រីថ្ងៃទី១៥ ខែមករាឆ្នាំ ២០២០ នៅរោងភាពយន្តMajor Cineplex ។
នៅក្នុងរឿងនេះនាយគ្រឿន សម្ដែងជាតួឯកប្រុសនិងជាអ្នកស៊ើបអង្កេតប៉ុន្តែកំប្លែងដែលជាអត្តសញ្ញាណរបស់លោកនៅតែមានដដែលពោល គឺ ជាអ្នកស៊ើបអង្កេតបែបកំប្លែងនេះឯង។ ត្បិតថានៅតែជាតួអង្គកំប្លែងនាយគ្រឿន ប្រាប់ថារឿងនេះលោកមានឈុតល្អូកល្អិនជាមួយតួស្រី ឈិន សៀវម៉ី ដ៏ស្រស់ស្អាតច្រើនជាងរឿងកន្លងទៅ។
នាយគ្រឿន អះអាងថាសម្ដែងកំប្លែងគឺ មានការលំបាកច្រើនព្រោះក្រៅពីកាយវិការ ត្រូវរកពាក្យពេចន៍មកនិយាយឲ្យគេសើច។ ដោយឡែកឈុតស្នេហាក៏ពិបាកមិនចាញ់គ្នាដែរ..ត្រង់ការសម្ដែងឲ្យចូលតួឲ្យវាស្និទ្ធគឺនាយហាក់មិនទាន់ល្អគ្រប់គ្រាន់ព្រោះតែខ្លាចតួស្រីយល់ផ្សេងមកលើ នាយ។
តារាស្រីសាច់ខ្ចី ឈិន សៀវម៉ី បានលើកឡើងថាទោះបីជួបគ្នាលើកដំបូងមែនប៉ុន្តែមិនមានបញ្ហាប្រឈមនឹងការសម្តែងឡើយ។ នាងថាកាន់តែ ប្លែកក្រោយពីនាងបានសម្តែងក្នុងភាពយន្តកំប្លែងមួយនេះ ដែលជាភាពយន្តខ្នាតធំលើកដំបូង។ នាងមានមានសាច់រឿងបែបកំប្លែង និងឈុត ឆាកថ្មី ក៏បង្កប់ដោយទស្សនិៈអប់រំផងដែរ។
លោក លី វ៉េត ចាងហ្វាងផលិតកម្មវីស៊ីន បញ្ជាក់ថា នេះជារឿងទី ២ របស់ផលិតកម្ម បន្ទាប់ពីរឿង”ទេសចរណ៍ ឋាន នរក” ហើយថាបន្ទាប់ពីនេះ ទៅផលិតកម្ម លោកក៏នៅមានរឿងបន្តបន្ទាប់ទៀតដែលមានរសជាតិថ្មីពីរឿង២ ខាងលើ។ លោកថាភាពយន្ត នេះសម្រិត សម្រាំង ការផលិត ប្រមាណកន្លះឆ្នាំ មុនពេលចាក់បញ្ចាំងជាផ្លូវការនៅគ្រប់រោងភាពយន្តចាប់ពីថ្ងៃទី១៦ ខែមករានេះតទៅ។ លោកថាជាភាពយន្តមានរសជាថ្មីប្លែក និងមានការយកចិត្តទុកដាក់ខ្ពស់លើការផលិតដើម្បីឲ្យភាពយន្តនេះអាចប្រកួតប្រជែងនៅលើទីផ្សារ៕
