រថយន្ដយោធារបស់កងពលតូចដឹកជញ្ជូនលេខ៩៩ ដឹកពលករមកពីព្រំដែនអូស្មាច់ ដើម្បីធ្វើចត្តាឡីស័កនៅខេត្តតាកែវ និងខេត្តកំពត បានជួបគ្រោះថ្នាក់ចរាចរណ៍ក្រឡាប់ បណ្ដាលឲ្យមនុស្ស២នាក់រងរបួសធ្ងន់ ។
សមត្ថកិច្ចមូលដ្ឋាន បានប្រាប់អ្នកសារព័ត៌មានឲ្យដឹងថា ហេតុការណ៍រថយន្តដឹកពលករមកពីព្រំដែនថៃ ហើយជួបគ្រោះថ្នាក់ចរាចរណ៍នេះ បានកើតឡើងនៅវេលាម៉ោង៤និង៣០នាទីទាបភ្លឺ ថ្ងៃទី១៣ ខែមីនា ឆ្នាំ២០២១នេះ នៅចំណុចខាងជើងស្ពានស្លាគូ ស្ថិតក្នុងស្រុកសំរោង ខេត្តតាកែវ។
ក្នុងហេតុការណ៍នេះ បានបណ្ដាលឲ្យមនុស្ស២នាក់រងរបួសធ្ងន់ ក្នុងនោះមានមន្ដ្រីយោធាដែលជាអ្នកបើកបរ រងរបួសបាក់ឆ្អឹងដងកាំបិត និងពលករជាស្ដ្រីម្នាក់រងរបួសត្រូវក្បាល ហើយត្រូវបានបញ្ជូនទៅសង្គ្រោះនៅមន្ទីរពេទ្យភ្លាមៗផងដែរ ។ រថយន្ដនេះដឹកកម្មករ៩នាក់ ដើម្បីទៅធ្វើចត្តាឡីស័កនៅខេត្តតាកែវ និង ខេត្តកំពត ៕
