កំពង់ឆ្នាំង ៖ ខេត្តកំពង់ឆ្នាំង នៅមិនទាន់មានសញ្ញាថមថយនៅឡើយទេ ចំនួនអ្នកឆ្លងជំងឺកូវិដ ១៩ នៅតែច្រើន ។ ជាក់នៅថ្ងៃទី២២ ខែកក្កដា ឆ្នាំ២០២១នេះ រដ្ឋបាលខេត្តកំពង់ឆ្នាំង បានចេញសេចក្តីប្រកាសព័ត៌មាន ស្តីពីការរកឃើញអ្នកឆ្លងជំងឺកូវិដ១៩ថ្មី ចំនួន៤៦នាក់ថ្មី បន្ថែមទៀត ។
ផ្សារលើដែលជាផ្សារធំជាងគេ នៅក្នុងខេត្តកំពង់ឆ្នាំង ត្រូវបានអាជ្ញាធរសម្រេចបិទជាបណ្តោះអាសន្ន អស់រយះពេលជាង១០ថ្ងៃមកហើយ ដើម្បីទប់ស្កាត់ការឆ្លងរាលដាល នៃជំងឺកូវិដ១៩ ។ ហើយនៅព្រឹកថ្ងៃទី២២ កក្កដា នេះ មន្ត្រីអាជ្ញាធរ និង ក្រុមគ្រូពេទ្យ បានចុះទៅយកសំណាកធ្វើតេស្តរហ័ស លើអាជីវករ រាប់រយនាក់បន្តទៀត ក្រោយពីបានរកឃើញអ្នកវិជ្ជមានថ្មី ជាបន្តបន្ទាប់មកនោះ ។
រដ្ឋបាលខេត្តខេត្តកំពង់ឆ្នាំង បានអំពាវនាវដល់បងប្អូនប្រជាពលរដ្ឋ ដែលធ្លាប់បានប្រាស្រ័យទាក់ទងដោយផ្ទាល់ ឬប្រយោល ជាមួយអ្នកវិជ្ជមានកូវិដ១៩ ខាងលើក្នុងរយះពេល១៤ថ្ងៃមុន សូមមកពិនិត្យសំណាកជាបន្ទាន់ នៅមន្ទីរពេទ្យខេត្តកំពង់ឆ្នាំង, មន្ទីរពេទ្យបង្អែកកំពង់ត្រឡាច មន្ទីរពេទ្យបង្អែកបរិបូរណ៍ ឬមណ្ឌលសុខភាព ដែលនៅជិតបំផុត ៕
