លោក ទាំ ម៉ាត់ គ្រូបង្គោលក្រុមបាល់ទាត់ខេត្តកំពង់ឆ្នាំង មិនទាន់ពេញចិត្តនៅឡើយជុំវិញតំបន់ប្រយុទ្ធរបស់លោក ទោះអាចឈ្នះក្រុមខេត្តតាកែវ២ទល់នឹង០ ក្នុងការប្រកួតពានរង្វាន់សម្ដេចអគ្គមហាសេនាបតីតេជោ ហ៊ុន សែន ថ្នាក់ខេត្ត ២០២១ ប្រចាំពូល ក កាលថ្ងៃពុធ ទី១៧ ខែកុម្ភៈ កន្លងទៅ។
តាមការចេញផ្សាយរបស់គេហទំព័រគណៈកម្មការប្រកួតបាល់ទាត់ជាតិកម្ពុជា(CNCC) លោក ទាំ ម៉ាត់ បានលើកឡើងថា សង្កេតទាំង២វគ្គ ខ្សែការពារធ្វើបានល្អដូចផែនការ ហើយតំបន់បម្រើធ្វើបានមធ្យម តែតំបន់ប្រយុទ្ធមិនទាន់ល្អនោះទេ ទោះអាចរកបាន២គ្រាប់ក៏ដោយ។ និយាយរួមទៅ មានឱកាសច្រើន តែធ្វើមិនបានល្អ។
លោក ទាំ ម៉ាត់ បន្តថា កូនក្រុមធ្វើបានល្អក្នុងវគ្គទី១ តែដើមវគ្គទី២ បែរជាខុសពីការរំពឹងទុកបន្តិច។ យ៉ាងណា ១៥នាទីចុងក្រោយ ពួកគេអាចធ្វើបានប្រសើរឡើងវិញពេលក្រុមតាកែវថមថយកម្លាំង។ លោកថា នឹងព្យាយាមកែប្រែចំណុចខ្វះខាត និងរំពឹងអាចធ្វើបានល្អនៅប្រកួតក្រោយៗ។
គួរបញ្ជាក់ថា នៅប្រកួតបន្ទាប់ ខេត្តកំពង់ឆ្នាំង នឹងត្រូវធ្វើដំណើរទៅប្រកួតនៅខេត្តកំពង់ស្ពឺវិញម្តង ថ្ងៃទី២៣ ខែកុម្ភៈ៕
រូបភាព៖ CNCC
