លោក វង្ស ពិសិដ្ឋ ជាផលិតករល្បីឈ្មេាះមួយរូប សុខចិត្តលក់ឡានផ្ទាល់ខ្លួនដើម្បីផលិតភាពយន្តរបស់ខ្លួនអោយចប់ជាស្ថាពរ គឺរឿងគ្រូ BIG ទើបសម្ពោធដាក់បញ្ចាំងផ្លូវការកាលពីម្សិលមិញ។ មិនត្រឹមតែលក់ឡានដើម្បីថតភាពយន្តប៉ុណ្ណេាះទេ ផលិតកររូបនេះថែមទាំងប្រកាសបរិច្ចាគ ប្រាក់ចំណេញ២០ភាគរយបានមកពីរឿងនេះ ជួយដល់មន្ទីរពេទ្យ គន្ធបុប្ផា និងការងារសង្គមទៀតផង។
លោក វង្ស ពិសិដ្ឋ អ្នកដឹកនាំរឿង និងជាថៅកែផលិតកម្ម បានអោយដឹងថា ព្រោះតែចិត្ត ស្រឡាញ់ភាពយន្តរបស់ខ្មែរយើង អោយមានចរាចរ ទៅមុខ លោក បានរួមចំណែក បោះទុនប្រមាណជាង៤មុឺនដុល្លារ កសាងស្នាដៃទី១នេះ ដើម្បីចង់ដឹងថាទៅដល់កម្រិតណា។ លោកពិសិដ្ឋ និយាយទាំងញញឹម មុឺងមាត់ថា« អស់ប៉ុន្មានក៏សុខចិត្ត ទៅមុខទៀត ទោះអស់ឡាន១ ក៏មិនចាត់ទុកថាបាក់ទឹកចិត្តឡើយ។ បើមាន១០គ្រឿងទៀតក៏ ដោះដូរយកមក ចំណាយលើកុនខ្មែរដែរ។
លោកបន្តថា ផលិតរឿងដំបូងអត់ទាន់ដឹងចំណេញទេ តែក៏បានរៀបចំខ្ទង់ចំណាយ២០ភាគរយកាត់ចូលមនុស្សធម៌ ។ ក្នុងនោះ១០ភាយរយ ចូលសមាគម ចាស់ជរា ដែលមានលោក ហេង ឡុង ជាអ្នកចាត់ចែង និង១០ភាគរយ ទៀតជួយដល់មន្ទីរពេទ្យគន្ឋបុប្ឋា។
លោក ហេង ឡុងវិញ ដែលបានចូលរួមដឹងឭដែរនោះ បានលើកឡើងថា សម្រាប់លោកសូមលើកទឹកចិត្តដល់ផលិតកររូបនេះ ហើយពិតជាមិនអោយលោកអស់សង្ឃឹមនោះទេ។ ប្រសិនបើរឿងដំបូងគាត់ខាតអស់លទ្ឋភាព គឺលោកសន្យាថានឹងរកទីផ្សារអោយ បានដឹកនាំផលិតកុនទៀត នាបណ្តាផលិតកម្មផ្សេង សំខាន់អោយតែចេះជំនាញរបស់គាត់មានពិត។ យើងមិនចង់មើលនឹង ភ្នែករបស់ផលិតករខ្មែរណាលំបាកនោះទេ ជួយអ្វីបានគឺជួយ មនុស្សមានឆន្ទៈដើម្បីសង្គមយើងពិតជាមិនរំលងនោះ។
លោកបន្តថា នឹងព្យាយាមបំផុសស្នាដៃផលិតរបស់ លោកពិសិដ្ឋ អោយមហាជនបានជ្រាបហើយ នេះជាផលិតកម្មដំបូងគេ ដែលហានសម្រេចដកភាគរយដើម្បីចាស់ជរា និងគន្ឋបុប្ឋា។
លោក ម៉ារ៉ា ប៊ុណ្ណា ដែលជាតារាចម្រៀង និងសម្តែងហើយសហការផលិតដែរនោះ បានបញ្ជាក់ដែរថាពាក់ព័ន្ឋរឿងភាគរយយកមកជួយសមាគម និងពេទ្យគន្ឋបុប្ឋា ដោយសារកើតចេញពីហេតុការណ៍ លោកឃើញនាយស្មាញគ្រោះថ្នាក់បាត់បង់ជីវិត។ ពេលនោះមានតែទំនាក់ទំនងទៅលោក ហេង ឡុង ក៏បញ្ជាអោយ យកប្រាក់សមាគមជួយដោះស្រាយភ្លាមៗ សិន។ ដូចនេះហើយទើបលោកសម្រេចថា ការជួយចាស់ជរាក្នុងសិល្បៈគឺជារឿងសំខាន់មួយ៕
