ក្រោយបើកការប្រណាំងចេញពីរង្វង់មូលព្រឹទ្ធាចារ្យ សាយ ភូ ថង ប្រមាណ ៥ម៉ោងរួចមក ក្រុមកីឡាករជាតិ-អន្តរជាតិ និងក្រុមរៀបចំព្រឹត្តិការណ៍នេះបានមកដល់ទីលើកំពូលភ្នំបូកគោ ខេត្តកំពតហើយ ក្នុងរយៈចម្ងាយប្រមាណ ១៧២.៥គីឡូម៉ែត្រ សម្រាប់ថ្ងៃទី២នៃព្រឹត្តិការណ៍ប្រណាំងកង់ពិភពលោកលើកទី១ តាមបណ្ដោយឆ្នេរសមុទ្រកម្ពុជា ឆ្នាំ២០២០។ នេះបើយោងតាមការចេញផ្សាយរបស់ក្រសួងទេសចរណ៍ ។
គួរបញ្ជាក់ថា ការបាញ់កាំភ្លើងបើកការប្រណាំងកង់ពិភពលោកនេះ ត្រូវបានធ្វើឡើងក្រោមវត្តមាន លោកជំទាវ មិថុនា ភូថង អភិបាលខេត្តកោះកុង និង ឯកឧត្តម វ៉ាត់ ចំរើន អគ្គលេខាធិការនៃគណៈកម្មាធិការអូឡាំពិកកម្ពុជា (NOCC) នៅចំណុចវង្វង់មូលព្រឹទ្ធាចារ្យ សាយ ភូថង នាវេលាម៉ោង១១ព្រឹក ថ្ងៃទី០៥ ខែមករា ឆ្នាំ២០២០។
បន្ទាប់ពីធ្វើការជម្រុះតាំងពីថ្ងៃទី០៤ ខែមករា ឆ្នាំ២០២០មក គិតមកដល់ពេលនេះកីឡាករដែលនៅបន្តចូលរួមប្រណាំងនៅសល់ប្រមាណ ៧៥នាក់។ ជាមួយគ្នានេះ ពេលធ្វើដំណើរមកដល់កំពូលភ្នំបូកគោ ក្រុមកីឡាករ និងក្រុមការងាររៀបចំព្រឹត្តិការណ៍និងសម្រាកនៅទីនោះមួយយប់ មុនបន្តប្រកួតនៅថ្ងៃទី៣ ដែលត្រូវនឹងថ្ងៃទី០៦ ខែមករា ឆ្នាំ២០២០ដែលនឹងចាប់ផ្ដើមចេញដំណើរពីក្លោងទ្វារចូលឧទ្យានជាតិព្រះមុនីវង្ស បូកគោ ឆ្ពោះទៅខេត្តកែប ដែលជាទីបញ្ចប់នៃព្រឹត្តិការណ៍ប្រណាំងកង់ពិភពលោកលើកទី១ តាមបណ្ដោយឆ្នេរសមុទ្រកម្ពុជា រយៈពេល៣ថ្ងៃនេះ៕
