អភិបាល​ខេត្តកំពង់​ឆ្នាំង អំពាវ​នាវ​ឲ្យមន្ត្រី​​​មូល​ដ្ឋាន​សហការ​ជាមួយ​មន្ត្រីជំនាញ​ការពារ​​និង​ទប់ស្កាត់​សកម្មភាព​កាប់​រុករាន​ទន្ទ្រាន​ដីព្រៃ​របស់រដ្ឋ​ធ្វើ​កម្ម​សិទ្ធិ​

កំពង់ឆ្នាំង ៖ ឯកឧត្តមឈួរ ច័ន្ទឌឿន អភិបាលខេត្តកំពង់ឆ្នាំង នៅថ្ងៃនេះ បានធ្វើការអំពាវនាវទៅកាន់មន្ត្រីអាជ្ញាធរមូលដ្ឋានឲ្យ​​រួម​សហការ​​គ្នាជា​មួយ​មន្ត្រី​​ជំនាញ​ ក្នុងការ ការពារដីព្រៃរបស់រដ្ឋ និងទប់ស្កាត់​សកម្មភាពកាប់​រុករានទន្ទ្រានយកដីព្រៃ​របស់រដ្ឋ​ធ្វើកម្មសិទ្ធ ឲ្យមានប្រសិទ្ធ​ភាព។ ការក្រើន​រំលឹក​ដល់​មន្រ្តីមូលដ្ឋានបែបធ្វើឡើងនៅក្នុងឱកាសដែលឯកឧត្តម អភិបាលខេត្ត អញ្ជើញដាំកូនឈើប្រណិតចំនួន១២០០ដើម​នៅក្នុង​ដែន​ជម្រក​សត្វព្រៃ​ភ្នំ​ឱ​រ៉ាល់ ​ស្ថិតក្នុងស្រុកទឹកផុស កាលពីថ្ងៃទី២៤ ខែសីហា ឆ្នាំ២០២០ ។

ឯកឧត្តម អភិបាលខេត្ត បានបញ្ជាក់ថា បច្ចុប្បន្នមាន​ក្រុមជនខិលខូចមួយចំនួន តែងតែបានបំផុស​បំផុសឲ្យប្រជាពលរ​ដ្ឋធ្វើ​សកម្មភាព រំលោភ​បំពាន កាប់ទន្ទ្រានយកដីព្រៃរបស់រដ្ឋ មកធ្វើជាកម្មសិទ្ធិដោយខុសច្បាប់ ។ ដូចជាករណីដីនៅក្នុងដែនជម្រកសត្វព្រៃភ្នំឱរ៉ាល់នេះ ហើយ បើអាជ្ញាធរ​ខេត្ត​​ពុំ​មាន​​វិធានការទាន់ពេលវេលា​នោះទេ នឹង ត្រូវកាប់បំផ្លាញខ្ទេចខ្ទីជាក់​ជាមិនខាន។

ឯកឧត្តមឈួរ ច័ន្ទឌឿន អភិបាលខេត្តកំពង់ឆ្នាំង បានបញ្ជាក់ថា ការបាត់បង់ធនធានធម្មជាតិ​ព្រៃឈើគឺជាចំណែកមួយក្នុងចំណោម​បញ្ហាធំៗ​ក្នុង​ពិភព​លោក ដែលជះឥទ្ធិពលអាក្រក់ ដូចជាជួបគ្រោះរាំងស្ងួត ខ្យល់ព្យុះ គ្រោះទឹកជំនន់ និងការបំម្រែបំម្រួល អាកាសធាតុ ដែលអាច ធ្វើអោយមាន ផល​ប៉ះ​ពាល់​​​ដល់ប្រជាកសិករក្នុងការប្រកប មុខរបរកសិកម្មផងដែរ ។

ឯកឧត្តមបានអំពាវនាវសូមឲ្យប្រជាពលរដ្ឋបញ្ឈប់នូវសកម្មភាពកាប់បំផ្លាញព្រៃឈើ ការទន្ទ្រានយកដីព្រៃរបស់រដ្ឋ ព្រោះជាអំពើខុសច្បាប់។ហើយ​ត្រូវ​ចូល​រួមការពារ ថែរក្សា និង អភិរក្សព្រៃឈើ ដោយមានការចូលរួមជាមួយនិងមន្ដ្រីអាជ្ញាធរមូលដ្ឋាន និង មន្រ្តីជំនាញជាប់ជាប្រចាំ ធ្វើឲ្យតំបន់​នេះ​ក្លាយជា​តំបន់បៃ​តង គ្រប់​រដូវកាល ៕

ព័ត៌មាន​ទាក់​ទង

ភ្ជាប់ទំនាក់ទំនងជាមួយ វិទ្យុ ម៉ាយអេហ្វអឹម ខេត្តកំពង់ឆ្នាំង