ឯកឧត្តម ឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរង នៃកងយោធពលខេមរភូមិន្ទ មេបញ្ជាការកងទ័ពជើងគោក នៅថ្ងៃទី១០ ខែវិច្ឆិកា ឆ្នាំ២០២០ បានអញ្ជើញចូលរួមក្នុងកម្មវិធីសំណេះ សំណាលសាកសួរសុខទុក្ខ និងចុះចែកអំណោយដ៏ថ្លៃថ្លារបស់ សម្តេចអគ្គមហាសេនាបតីតេជោ ហ៊ុន សែន និងសម្តេចកិត្តិព្រឹទ្ធបណ្ឌិតជូនប្រជាពលរដ្ឋរងគ្រោះដោយទឹកជំនន់ចំនួន ១១,០០០គ្រួសារ នៅស្រុកមង្គលបូរី ខេត្តបន្ទាយមានជ័យ។
ឯកឧត្តម ឧត្តមសេនីយ៍ឯក ហ៊ុន ម៉ាណែត បានថ្លែងថា នៅឆ្នាំ២០២០នេះ ប្រទេសកម្ពុជាបានរងគ្រោះធម្មជាតិដោយទឹកជំនន់ជន់លិចផ្ទះសំបែងប្រជាពលរដ្ឋ ដោយឡែកនៅទិសពាយព្យ នៃប្រទេសកម្ពុជា មានខេត្តមួយចំនួនបានរងគ្រោះដោយទឹកជំនន់យ៉ាងធ្ងន់ធ្ងរក្នុងនោះ ខេត្តបន្ទាយមានជ័យ គឺបានរងផលប៉ះពាល់ផ្ទះសំបែងរបស់ប្រជាពលរដ្ឋ ព្រមទាំងដំណាំកសិកម្ម អស់ជាច្រើនផងដែរ។
ឯកឧត្តម ឧត្តមសេនីយ៍ឯក បានបន្តថា នេះគឺជាការខិតខំប្រឹងប្រែងពីប្រមុខរាជរដ្ឋាភិបាលកម្ពុជា ក្រោមការដឹកនាំរបស់សម្តេចតេជោ ហ៊ុន សែន ដោយសម្តេចបានណែនាំឱ្យចុះសួរសុខទុក្ខ និងនាំយកអំណោយចែក ជូនដល់ប្រជាពលរដ្ឋដែលរងគ្រោះដោយទឹកជំនន់នៅខេត្តបន្ទាយមានជ័យ ចំនួនជាង១ម៉ឺនគ្រួសារ។
គួរបញ្ជាក់ថា អំណោយដែលបានផ្តល់ជូនប្រជាពលរដ្ឋនៅស្រុកមង្គលបូរី នេះ គឺក្នុង១គ្រួសារ ត្រូវទទួលរួមមាន ស្រូវពូជសែនក្រអូប១០០គីឡូក្រាម ស្បៀងអាហារ សម្ភារៈប្រើប្រាស់ប្រចាំថ្ងៃ និងថវិកា៥ម៉ឺនរៀល។ ដោយឡែកកាលពីព្រឹកថ្ងៃទី០៧ ខែវិច្ឆិកា ឧត្តមសេនីយ៍ឯក ហ៊ុន ម៉ាណែត ក៏តំណាងសម្ដេចតេជោ ហ៊ុន សែន ក៏បាននាំយកពូជស្រូវទៅចែកជូនប្រជាពលរដ្ឋជិត២ម៉ឺនគ្រួសារ នៅខេត្តពោធិ៍សាត់ផងដែរ៕
