តំបន់ទឹកធ្លាក់ធម្មជាតិចំនួនប៤ទីតាំងរួមមាន តំបន់ទឹកធ្លាក់អន្លង់ស្វាយ តំបន់ទឹកធ្លាក់ថ្មក្រាល តំបន់ទឹកធ្លាក់បង្គងរនាប និងតំបន់ទឹកធ្លាក់ស្រែអំពិល ក្នុងស្រុកទឹកផុស ខេត្តកំពង់ឆ្នាំង បានក្លាយជាគោលដៅទេសចរណ៍ សំខាន់ដែលរំពឹងថានឹងមានភ្ញៀវទេសចរណ៍ទៅលេងកម្សាន្ត ច្រើននារដូវបុណ្យភ្ជុំបិណ្ឌនេះ។ បើតាមការបញ្ជាក់អោយដឹងរបស់ លោក សេង សាលី ប្រធានមន្ទីរទេសចរណ៍ខេត្តកំពង់ឆ្នាំង ។
លោកប្រធានមន្ទីរ បន្តថាទីតាំងភូមិសាស្រ្តរបស់រមណីយដ្ឋានទឹកជ្រោះ និងព្រៃភ្នំយ៉ាងស្រស់ស្អាតទាំងបីនេះ មានដូចជា ទី១. ទឹកធ្លាក់អន្លង់ស្វាយ ដែលស្ថិតនៅក្នុង ភូមិដូងស្លា ឃុំក្បាលទឹក ទី២. ទឹកធ្លាក់ស្រែអំពិល ស្ថិតក្នុងភូមិស្រែអំពិល ឃុំក្តុលសែនជ័យ ទី៣. ទឹកធ្លាក់ថ្មក្រាល មានទីតាំង ស្ថិតនៅក្នុងភូមិកោះក្ទម្ព ឃុំជៀប និងទី៤ ទឹកធ្លាក់បង្គងរនាប មានទីតាំងឃុំជៀប ។
លោកក៏សង្កត់ធ្ងន់ដែរថា មន្ទីរទេសចរណ៍ខេត្តកំពង់ឆ្នាំង បានប្រជុំពិភាក្សាជាមួយ នគរបាលទេសចរណ៍ ដោយសហការត្រៀមរៀបចំផែនការរក្សាសន្តិសុខ សណ្តាប់ធា្នប់ ជូនភ្ញៀវទេសចរណ៍ នៅតាមតំបន់ រមណីយដ្ឋានទាំងនោះ នៅក្នុងឱកាសរដូវបុណ្យ ភ្ជុំបិណ្ឌខាងមុខផងដែរ ។
គួរបញ្ជាក់ថា ក្រៅពីប្រជាជនទូទៅស្គាល់ថាជាខេត្តល្បីល្បាញរឿងផលិត ក្អម ឆ្នាំងអំពី ដីនោះ ខេត្តកំពង់ឆ្នាំង ក៏កំពុងមានភាពល្បីល្បាញ ជាខេត្តដែលមានរមណីយដ្ឋាន ទេសចរណ៍ធម្មជាតិ បង្កប់ខ្លួននៅ តាមតំបន់ភ្នំ និងតាមដងទន្លេ ជាទាក់ទាញសម្រាប់ វិស័យទេសចរណ៍មួយដែរក្នុងប្រទេសកម្ពុជា។
ដោយឡែកបច្ចុប្បន្នស្រុកទឹកផុស ក៏បានក្លាយជាស្រុកមួយរបស់ខេត្តកំពង់ឆ្នាំង ដែលមានភ័ព្វសំណាងទទួលបានការអភិវឌ្ឍន៍យ៉ាងច្រើនពីរដ្ឋបាលខេត្តកំពង់ឆ្នាំង។ ការអភិវឌ្ឍន៍ ទាំងនោះរួមមាន ស្ពាន ផ្លូវថ្នល់ មន្ទីរពេទ្យ សាលារៀន និងអាគាររដ្ឋបាលសាលាស្រុកជាដើមនាប៉ុន្មានឆ្នាំចុងក្រោយនេះ៕
