សម្ដេចអគ្គមហាសេនាបតីតេជោ ហ៊ុន សែន ប្រធានគណបក្សប្រជាជនកម្ពុជា និងសម្ដេចអគ្គមហាពញាចក្រី ហេង សំរិន ប្រធានកិត្តិយសគណបក្ស រួមទាំងឥស្សរជនជាថ្នាក់ដឹកនាំជាន់ខ្ពស់របស់គណបក្សប្រជាជនកម្ពុជាជាច្រើនរូបផ្សេងទៀត នារសៀលថ្ងៃទី២៨ ខែមិថុនា ឆ្នាំ២០២០ បានអញ្ជើញចូលរួមក្នុងពិធីចម្រើនព្រះបរិត្ដឡើង«វិមាន ៧មករា» ទីស្នាក់ការកណ្ដាលគណបក្សប្រជាជនកម្ពុជា ដែលមានទីតាំងស្ថិតនៅតាមបណ្ដោយវិថីព្រះនរោត្តម ក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ។
ពិធីចម្រើនព្រះបរិត្ដឡើង«វិមាន ៧មករា»នេះ គឺប្រារព្ធឡើងចំថ្ងៃខួបលើកទី៦៩ នៃថ្ងៃកំណើតគណបក្សប្រជាជនកម្ពុជា(២៨ មិថុនា ១៩៥១- ២៨ មិថុនា ឆ្នាំ២០២០)។ អគារថ្មីនៃទីស្នាក់ការកណ្តាលគណបក្សប្រជាជនកម្ពុជាពោរពេញដោយប្រណិតភាព និងធំយ៉ាងស្កឹមស្កៃកណ្តាលរាជធានីភ្នំពេញក្នុងយុគ្គសម័យនៃការអភិវឌ្ឍដ៏រុងរឿងនោះ ត្រូវបានសាងសង់រួចរាល់ជាស្ថាពរហើយ។
វត្តមានថ្មីនៃអគារទីស្នាក់ការកណ្តាលរបស់គណបក្សប្រជាជនកម្ពុជា នឹងក្លាយទៅជាកន្លែងប្រតិបត្តិការងារដ៏សំខាន់របស់គណបក្សប្រជាជនកម្ពុជា ដែលជាគណបក្សកំពុងដឹកនាំរាជរដ្ឋាភិបាល និងទទួលខុសត្រូវខ្ពស់ចំពោះជោគវាសនាជាតិ និងប្រជាជនកម្ពុជា៕
