កំពង់ឆ្នាំង ៖ រយៈពេល៥ខែក្នុងឆ្នាំ២០២០នេះ ពោលគិតចាប់ពីខែមករាដល់ខែឧសភា សាខាពន្ធដាខេត្តកំពង់ឆ្នាំង ប្រមូលពន្ធលើមធ្យោបាយគ្រប់ប្រភេទបានប្រមាណជាង ៣.២៧៣លានរៀល ស្មើនឹងជាង ៥១,៣១ភាគរយ នៃផែនការជាង១ម៉ឺន៣ពាន់លានរៀល ។ នេះបើតាមការបញ្ជាក់របស់លោក វង្ស ឌីណា ប្រធានសាខាពន្ធដារខេត្តកំពង់ឆ្នាំង នៅថ្ងៃទី២២ ខែមិថុនា ឆ្នាំ២០២០នេះ។
លោក វង្ស ឌីណា បញ្ជាក់ទៀតថា ចំណូលពន្ធនេះមានការកើនឡើងរហូតដល់ជាង៤០៥លានរៀល ស្មើនឹង ៧,៣១ភាគរយ បើប្រៀបធៀបទៅនឹងរយៈពេលដូចគ្នានឹងឆ្នាំ២០១៩ ។ ហើយមូលហេតុដែលជម្រុញអោយការប្រមូលពន្ធ មានការកើនឡើងនេះគឺ ដោយសារបច្ចុប្បន្នប្រជាពលរដ្ឋមានការយល់ដឹងកាន់តែច្រើនអំពីកត្តព្វកិច្ចបង់ពន្ធគ្រប់ប្រភេទ ពួកគាត់បាននាំគ្នាចូលមកបង់ពន្ធនៅតាមសាខាពន្ធដារ និង តាមធនាគារដែលបានធ្វើកិច្ចសហប្រតិបត្តិការជាមួយអគ្គនាយកដ្ឋានពន្ធដា ។ ក្រៅពីនេះសាខាពន្ធដា ក៏បានធ្វើការផ្សព្វផ្សាយយ៉ាងទូលំទូលាយ និងបើកសិក្ខាសាលាផ្សព្វផ្សាយដល់ប្រជាពលរដ្ឋ អាជីវករ ពាណិជ្ជករ និងអ្នកវិនិយោគិន ស្តីពីកាតព្វកិច្ចបង់ពន្ធ ពួកគាត់មានការយល់ដឹងកាន់តែច្បាស់ ចូលមកបង់ពន្ធមានការកើនឡើងជារៀងរាល់ឆ្នាំ ។
លោកប្រធានសាខាពន្ធដារខេត្តកំពង់ឆ្នាំង បានបន្តថា ដើម្បីធានាបានការប្រមូលពន្ធកាន់តែច្រើនឡើងលើសផែនការនោះ គឺបន្តអនុវត្តន៍ពង្រឹងក្រមសីលធម៌ និង កិរិយាមាយាទមន្រ្តីពន្ធដាអោយកាន់តែប្រសើរឡើង បន្តពង្រឹង និងកែលម្អការផ្តល់សេវាសាធារណៈជូនអ្នកជាប់ពន្ធ ពង្រឹងកិច្ចសហការជាមួយស្ថាប័នពាក់ព័ន្ធ ពិសេសអាជ្ញាធរមូលដ្ឋានក្នុងការប្រមូលពន្ធ លើអចលនទ្រព្យ បន្តពង្រឹងកម្មវិធីផ្សព្វផ្សាយ និង លើកកម្ពស់វប្បធម៌បង់ពន្ធ កាន់តែប្រសើឡើង ដើម្បីឆ្លើយតបតាមផែនការ។
គួរបញ្ជាក់ថា ប្រាក់ពន្ធដែលប្រមូលបានខាងលើរួមមាន ពន្ធលើប្រាក់បៀវត្ស ពន្ធប្រថាប់ត្រា ពន្ធលើរំដោះលើប្រាក់ចំណេញនីតិបុគ្គល ពន្ធផាកពិន័យ និង ទោសបញ្ញត្តិ សារពើពន្ធ ពន្ធអចលនទ្រព្យ ពន្ធអាករលើតម្លៃបន្ថែម ពន្ធអាករបំភ្លឺសាធារណៈ អាករស្នាក់នៅ ពន្ធប៉ាតង់ និង ពន្ធលើមធ្យោបាយដឹកជញ្ជូននិងយានជំនិះគ្រប់ប្រភេទ ៕
