កំពង់ឆ្នាំង ៖ នៅព្រឹកថ្ងៃសៅរ៍ ទី១៣ ខែមិថុនា ឆ្នាំ២០២០ សម្តេចចៅហ្វាវាំង វរវៀងជ័យ អធិបតីស្រឹង្គារ គង់ សំអុល ឧបនាយករដ្ឋមន្ត្រី ជារដ្ឋមន្រ្តីក្រសួងព្រះបរមរាជវាំងនិង និងជាអនុប្រធានអចិន្ត្រៃយ៍កាកបាទក្រហមកម្ពុជា រួមដំណើរដោយឯកឧត្ដម គុយ សុផល ទេសរដ្ឋមន្ត្រី ទទួលបន្ទុកកិច្ចការទូទៅអមក្រសួងព្រះបរមរាជវាំង លោក អម សុភា ប្រធានគណៈកម្មាធិការសាខាកាកបាទក្រហមកម្ពុជាខេត្តកំពង់ឆ្នាំង លោកស្រី ប៊ន សុភី អនុប្រធានគណៈកម្មាធិការសាខា បានអញ្ជេីញចុះសួរសុខទុក្ខកម្មការិនីចំនួន១៦នាក់ ដែលរងគ្រោះថ្នាក់ដោយការ ក្រឡាប់រឺម៉ក កាលពីព្រឹកថ្ងៃទី១២ ខែមិថុនា ឆ្នាំ២០២០ ក្នុងភូមិសាស្ត្រឃុំសេដ្ឋី ស្រុកសាមគ្គីមានជ័យ កំពុងសម្រាកព្យាបាលនៅមន្ទីរពេទ្យបង្អែកស្រុកកំពង់ត្រឡាច និង គ្លីនិកឯកជន។
សម្ដេចចៅហ្វាវាំង បានពាំនាំនូវការផ្ដាំផ្ញើសាកសួរសុខទុក្ខពីសំណាក់សម្ដេចកិត្តិព្រឹទ្ធបណ្ឌិតប៊ុនរ៉ានី ហ៊ុន សែន ប្រធានកាកបាទក្រហមកម្ពុជា ដែលសម្ដេចតែងគិតគូរជានិច្ចដល់សុខទុក្ខរបស់ប្រជាពលរដ្ឋគ្រប់ទិសទី ពិសេស ប្រជាពលរដ្ឋជួបការលំបាក និង រងគ្រោះដោយគ្រោះធម្មជាតិនិងគ្រោះថ្នាក់ផ្សេងៗ ។
ក្នុងឱកាសនោះ សម្ដេចចៅហ្វាវាំង ក៏បានឧបត្ថម្ភថវិកា និង សម្ភារៈមួយចំនួនដល់កម្មការិនីរងគ្រោះផងដែរ៕
