សម្ដេចចៅហ្វាវាំង គង់ សំអុល ព្រះរាជ​តំណាង​ដ៏ខ្ពង់ខ្ពស់​ព្រះមហាក្សត្រ នាំ​យ​កព្រះ​រាជ​អំណោយ​​ចែកជូន​ប្រជា​រាស្រ្តរង​គ្រោះ​ដោយខ្យល់​កន្ត្រាក់ នៅ​ស្រុក​សំរោង​ទង

សម្ដេចចៅហ្វាវាំង វរវៀងជ័យ អធិបតីស្រឹង្គារ៍ គង់ សំអុល ឧបនាយករដ្ឋមន្រ្ដី រដ្ឋមន្រ្តី​ក្រសួងព្រះបរមរាជវាំង និងជាព្រះរាជ តំ​ណា​ងដ៏ខ្ពង់ខ្ពស់របស់ព្រះករុណា ព្រះបាទ សម្ដេច​ព្រះបរមនាថ នរោត្ដម សីហមុនី ព្រះមហាក្សត្រនៃព្រះរាជាណាចក្រកម្ពុជា និង សម្ដេច​ព្រះមហាក្សត្រី នរោត្ដម មុនិនាថ សីហនុ ព្រះវររាជមាតាជាតិខ្មែរ បានអញ្ជើញជួប​សំណេះសំណាល និងនាំយក​ព្រះរាជ​អំណោយ​ព្រះមហាក្សត្រ និងសម្ដេចម៉ែចែកជូន​ប្រជា​រាស្រ្តរងគ្រោះដោយគ្រោះ​ធម្មជាតិ​ខ្យល់​កន្ត្រាក់​ចំនួន​៣៤២​គ្រួសារ​ នៅក្នុងឃុំសំបូរ ឃុំសំរោងទង និងឃុំត្រពាំងគង ស្រុកសំរោងទង ខេត្ដកំពង់ស្ពឺ កាលពីថ្ងៃទី០៨ខែមិថុនា ឆ្នាំ២០២០ ។

បន្ទាប់មក សម្ដេចចៅហ្វាវាំង គង់ សំអុល ព្រះរាជតំណាងដ៏ខ្ពង់ខ្ពស់របស់ព្រះអង្គ​ទាំងទ្វេបាន​ពាំនាំនូវ​ព្រះរាជបណ្ដាំ​សាក​សួរសុខ​ទុក្ខ និងព្រះរាជហឫទ័យអាណិត​ស្រឡាញ់ និងសេចក្ដីនឹករលឹកយ៉ាងជ្រាលជ្រៅបំផុតរបស់ព្រះករុណា ព្រះ​បាទ​សម្ដេច​​ព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា និងសម្ដេច​ព្រះមហាក្រត្រី​ព្រះវររាជមាតា​ជាតិ​ខ្មែរជាទីសក្ការៈដ៏ខ្ពង់ខ្ពស់បំផុត ជូនចំពោះប្រជារាស្ត្រ ជាកូនចៅ ចៅទូតនៅទូទាំងប្រទេស ពិសេសព្រះរាជហឫទ័យ​យកចិត្ដទុកដាក់ ចំពោះ​ជីវភាព​រស់នៅរបស់បងប្អូនប្រជារាស្រ្ដរបស់ព្រះអង្គ។

ព្រះរាជអំណោយព្រះមហាក្សត្រ និងសម្ដេចម៉ែដែលបានព្រះរាជទាន ជូនដល់​ប្រជា​រាស្រ្តរងគ្រោះដោយគ្រោះ​ធម្មជាតិ​ទាំង​នោះ ក្នុងមួយគ្រួសារៗទទួលបានអង្ករ ៥០​គីឡូក្រាម ឃីត១កញ្ចប់ (មុង១ ភួយ១ សារុង១ និងក្រមា១) មី១កេស ត្រីខ ១០កំប៉ុង កៅស៊ូ​តង់ចំនួន ១ផ្ទាំង សាប៊ូ៥ដុំ អាវយឺតមានស្លាកព្រះរាជអំណោយ ព្រះករុណា​ព្រះបាទសម្តេចព្រះបរមនាថ នរោត្តម សីហ​មុនី ព្រះមហាក្សត្រ នៃព្រះរាជាណាចក្រ​កម្ពុជា ចំនួន១ និងថវិកាចំនួន ៨០ម៉ឺនរៀល សម្រាប់ប្រជារាស្រ្តរងគ្រោះ​ធ្ងន់ធ្ងរចំនួន​២១​គ្រួសារ និងថវិកា ៤០ម៉ឺនរៀលសម្រាប់ប្រជារាស្រ្តរងគ្រោះស្រាលចំនួន៣២១គ្រួសារ៕

ព័ត៌មាន​ទាក់​ទង

ភ្ជាប់ទំនាក់ទំនងជាមួយ វិទ្យុ ម៉ាយអេហ្វអឹម ខេត្តកំពង់ឆ្នាំង