កម្ពុជា-ចិន នឹងធ្វើសមយុទ្ធរូមគ្នានៅពាក់កណ្តាលខែមីនានេះ

សមយុទ្ធនាគមាសឆ្នាំ២០២០ ដែលធ្វើរួមគ្នារវាងកងយោធពលខេមរភូមិន្ទ និងកងទ័ពរំដោះ​ប្រជាជន​ចិន នឹង​ធ្វើឡើង​ចាប់ពី​ថ្ងៃទី​១៤ ខែមីនា ដល់ថ្ងៃទី០១ ខែមេសា ឆ្នាំ២០២០ នៅសាលា​ហ្វឹកហ្វឺន​តេជោសែនជុំគិរី នៅក្នុងស្រុកជុំគិរី ខេត្តកំពត។

បើតាម​ឯកឧត្តម នាយឧត្តមសេនីយ៍ ឈុំ សុជាត អ្នកនាំពាក្យរបស់​ក្រសួងការពារជាតិ បានបញ្ជាក់ថា សមយុទ្ធ​នាគ​មាស​ឆ្នាំ​២០​២០ នៅតែបន្តផ្តោតសំខាន់លើការ​ប្រឆាំង​ភេវរកម្ម​ និងការងារមនុស្សធម៌ ដែលជាឱកាសសម្រាប់កងទ័ពប្រទេសទាំង២ កម្ពុជា-ចិន បន្តសិក្សារៀនសូត្រ ដកបទពិសោធន៍​ទៅវិញទៅមក ដើម្បីបង្កើនសមត្ថភាពវិជ្ជាជីវៈ ក្នុងជួយសង្រ្គោះ​ប្រជាពលរដ្ឋ​ពេល​មានគ្រោះមហន្តរាយ ការរក្សាសន្តិភាព ក៏ដូចជាសម្រាប់ការបំពេញភារកិច្ចការពារជាតិ កាន់តែមានប្រសិទ្ធភាព និងខ្លាំង​ក្លាថែមទៀត។

ឯកឧត្តម នាយ​ឧត្តមសេនីយ៍ បានបន្ថែមថា គ្រឿងយុទ្ធភណ្ឌសម្រាប់​បម្រើឱ្យសមយុទ្ធ​នេះ រួមមាន​​ឧទ្ធម្ភាចក្រ កាំភ្លើងធំ​រថក្រោះ​ រថពាសដែក កាំភ្លើងត្បាល អាវុធធុនស្រាល និងបរិក្ខាយោធា​មួយចំនួនទៀតជាដើម។ សមយុទ្ធនាគមាស បាន​ចូល​រួម​ចំណែកយ៉ាងសំខាន់ក្នុងការជំរុញមិត្តភាព ទំនាក់ទំនង កិច្ចសហប្រតិបត្តិការកម្ពុជា-ចិន ឱ្យកាន់តែរឹងមាំ ជាពិសេសកិច្ច​សហ​ប្រតិបត្តិ​ការរវាង​កងយោធពល​ខេមរភូមិន្ទ និងកងទ័ពរំដោះប្រជាជនចិន ។

គួរបញ្ជាក់ថា សមយុទ្ធនាគមាសឆ្នាំ២០២០ នេះ ជាលើកទី៤ហើយ ដែលកងទ័ពកម្ពុជា-ចិន ធ្វើ​លំហាត់​នាគមាសរួមគ្នា នៅក្នុង​លើទឹកដីប្រទេសកម្ពុជា ដោយលើកទី១ធ្វើឡើងនៅឆ្នាំ២០១៦ និងលើកទី២ នៅឆ្នាំ២០១៨ លើកទី៣ នៅឆ្នាំ២០១៩។ ដោយ​ឡែក​ឆ្នាំសម្រាប់ឆ្នាំ២០២០ សមយុទ្ធ​នាគមាសនេះ​ មានកម្លាំងចូលរួមសរុបជាង៣ពាន់នាក់ ដែលក្នុងនោះភាគីចិនមានកងទ័ព​ចូលរួមសរុប ២៦៥នាក់ ចំណែកភាគីកម្ពុជាមានកម្លាំងចូលរួម២៨៧១នាក់៕

ព័ត៌មាន​ទាក់​ទង

ភ្ជាប់ទំនាក់ទំនងជាមួយ វិទ្យុ ម៉ាយអេហ្វអឹម ខេត្តកំពង់ឆ្នាំង