កំពង់ឆ្នាំង ៖ ប្រជាពលរដ្ឋនៅក្នុងក្រុងកំពង់ឆ្នាំង បានបង្ហាញក្តីបារម្ភពីសុវត្ថិភាពពេលកំពុងធ្វើដំណើរនៅលើដងផ្លូវ ខណៈរថយន្តដឹកសំរាមមួយគ្រឿងរបស់ក្រុងកំពង់ឆ្នាំង មានសភាពចាស់ទ្រុឌទ្រោមខ្លាំងទៅហើយ ប៉ុន្តែនៅតែត្រូវបានប្រើប្រាស់នៅលើដងផ្លូវនានាក្នុងក្រុងកំពង់ឆ្នាំង។
ប្រជាពលរដ្ឋ បានលើកឡើងពីសភាពរបស់រថយន្តមួយគ្រឿងនេះថា ពេលបើកចេញប្រមូលសំរាមម្តងៗ សម្លេងម៉ាស៊ីនរោទិ៍ប្រៀបបាននឹងសំលេងរថក្រោះ គួបផ្សំជាមួយផ្សែងខ្មៅហុយខ្មួរខ្មាញ់ ហើយជញ្ជាំងដាក់ខ្ចៅលែងជាប់បែរជាយកខ្សែមកចងជំនួសជាដើម។ ដោយឡែកសំបកកង់វិញអស់ក្រឡា មានប្រហោង ដែលមិនគួរឲ្យធ្វើចរាចរណ៍នៅលើផ្លូវសាធារណ:តទៅទៀតឡើយ ពីព្រោះវាអាចនឹងបង្កគ្រោះថ្នាក់ជាយថាហេតុដល់អ្នកដទៃដែលកំពុងធ្វើដំណើរនៅលើដងផ្លូវជាមួយ។
ប្រជាពលរដ្ឋ បានចោទជាសំណួរថា តើស្ថានភាពរថយន្តបែបនេះ សមស្របតាមលក្ខណៈបច្ចេកទេសសុវត្ថិភាពដែលអាចបើកបរលើដងផ្លូវសាធារណ:បានដែរឬទេ?
