កម្លាំងនគរបាលអន្តរាគមន៍ និងព្រហ្មទណ្ឌខណ្ឌចំការមន បានឃាត់ខ្លួនបុរសជនជាតិចិនម្នាក់ រួមនឹងអាវុធខ្លីម៉ាកK៥៩ មួយដើមរួមនិងថ្នាំញៀនមួយចំនួនទៀត។ ហេតុការណ៍ឃាត់ខ្លួនជនជាតិចិននេះធ្វើឡើងកាលម៉ោង៨យប់ ថ្ងៃទី១៥ ខែ កុម្ភ: ឆ្នាំ២០២០ នៅចំណុចផ្សារទំនើប The Bridget ក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ។
សមត្ថកិច្ច បានឲ្យដឹងថា ជនសង្ស័យឈ្មោះ ZHAO YUHANG អាយុ២៤ឆ្នាំស្នាក់ខុនដូក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ ។
ប្រភពពីសមត្ថកិច្ច បានអោយដឹងថា នៅមុនពេលឃាត់ខ្លួនជនជាតិចិនរូបនេះ កម្លាំងប៉ុស្តិ៍ល្បាតក្នុងមូលដ្ឋាន ហើយក៏មានការភ្ញាក់ផ្អើលពីប្រជាពលរដ្ឋថា ឃើញបុរសជនជាតិចិនកាន់អាវុធខ្លីជាប់ដៃក្រោយមកកម្លាំងអន្តរាគមន៍ និងផ្នែកព្រហ្មទណ្ឌសហការជាមួយកម្លាំងប៉ុស្តិ៍ចុះបង្រ្កាបបានភ្លាមៗតែម្តង។
សមត្ថកិច្ច បានឲ្យដឹងទៀតថា នៅពេលឃាត់ខ្លួនជនជាតិចិននេះ សមត្ថកិច្ចដកហូតបានកាំភ្លើងម៉ាកK៥៩ មួយដើម និងកាបូបស្ពានពណ៌ទឹកដោះគោឆែកឆេករកឃើញថ្នាំក្រាមសថ្លាចំនួន១ថង់តូចសង្ស័យជាសារធាតុញៀន។
ជនសង្ស័យបានឆ្លើយសារភាពថា ថ្នាំញៀននិងកាំភ្លើងម៉ាកK៥៩ គេទិញពីបុរសម្នាក់អាយុប្រហែល៤០ឆ្នាំ ក្នុងតំលៃ ៨០០ដុល្លារសហរដ្ឋអាមេរិច រួចយកមកទុកនៅជាប់ខ្លួន ។ នៅយប់កើតហេតុនោះខ្លួនបានទៅរកទារលុយអ្នកដែលជំពាក់តែមកដល់ផ្សារទំនើបThe Bridget ក៏ត្រូវនគរបាលឃាត់ឆែកឆេររកឃើញអាវុធខ្លីតែម្ដង។
ជនសង្ស័យត្រូវឃាត់ខ្លួននៅអធិការដ្ឋាននគរបាលខណ្ឌចំការមន ដើម្បីកសាងសំណុំរឿងបញ្ជូលទៅកាន់សាលាដំបូងចាត់ការបន្តតាមនីតិវិធី៕
