អភិបាលរងខេត្តកំពង់ឆ្នាំង លោក ស្រ៊ន សំឫទ្ធី បានថ្លែងកោតសរសើរដល់ក្រុមការងារសមាគមអតីតយុទ្ធជនកម្ពុជាខេត្តកំពង់ឆ្នាំង ដែលតែងតែយកចិត្តទុកដាក់បំពេញភារកិច្ចរបស់ខ្លួនបានយ៉ាងល្អ ដោយបានចុះផ្ទាល់ដល់មូលដ្ឋានដែលមានប្រជាពលរដ្ឋជាគ្រួសារអតីតយុទ្ធជនកម្ពុជា ជួបការលំបាក ដើម្បីនាំយកសម្ភារ និងថវិកាប្រគល់ជូន។
ការថ្លែងកោតសរសើររបស់លោកអភិបាលរង ដូចនេះបានធ្វើឡើងនៅក្នុងពិធីប្រគល់ ទទួល សម្ភារ និងថវិកា ជូនដល់ក្រុមការងារចុះសួរសុខទុក្ខគ្រួសារអតីតយុទ្ធជនកម្ពុជាក្នុងខេត្តកំពង់ឆ្នាំង នៅតាមមូលដ្ឋានដែលជួបការលំបាកចំនួន ១៦០គ្រួសារកាលពីថ្ងៃទី២៧ ខែឧសភា ឆ្នាំ២០២០ នៅទីបញ្ជាការតំបន់ប្រតិបត្តិការសឹករងកំពង់ឆ្នាំង។
ជាមួយគ្នានោះ លោកអភិបាលរងខេត្ត ក៏បានថ្លែងនូវអំណរគុណយ៉ាងជ្រាលជ្រៅបំផុតចំពោះ សម្តេចតេជោ ហ៊ុន សែន នាយយករដ្ឋមន្ត្រី នៃព្រះរាជាណាចក្រកម្ពុជា និងជាប្រធានសមាគមអតីតយុទ្ធជនកម្ពុជា ដែលតែងតែយកចិត្តទុកដាក់ដល់បងប្អូនអតីតយុទ្ធជនកម្ពុជាទូទាំងប្រទេស ៕
