កំពង់ឆ្នាំង៖ អាជ្ញាធរស្រុកបរិបូណ៌ ខេត្តកំពង់ឆ្នាំង បានអំពាវនាវដល់ប្រជាពលរដ្ឋដែលរស់នៅជុំវិញបឹងខ្នារ អោយមានការប្រុង ប្រយ័ត្នខ្ពស់ចំពោះកូនចៅចុះលេងក្នុងទឹកបឹង ដែលអាចមានគ្រោះថ្នាក់ជាយថាហេតុ ជាមួយនឹងសត្វក្រពើ ដោយសារកាលពីថ្ងៃទី២៩ ខែសីហា ប្រជាពលរដ្ឋចាប់បានកូនក្រពើមួយក្បាលថ្មីទៀត។
ថ្លែងប្រាប់MYFM News តាមរយៈទូរស័ព្ទនៅព្រឹកថ្ងៃទី០១ ខែកញ្ញានេះ លោក យឹម សារិន អភិបាលស្រុកបរិបូណ៌ បានបញ្ជាក់ថា ពេលនេះអាជ្ញាធរស្រុក បានណែនាំអោយអាជ្ញាធរឃុំ ធ្វើការផ្សព្វផ្សាយដល់ប្រជាពលរដ្ឋដែលរស់នៅជុំវិញបឹងខ្នារអោយមានការប្រុងប្រយ័ត្នជាមួយសត្វក្រពើនេះហើយ។ ជាមួយគ្នានេះ អាជ្ញាធរក៏កំពុងស្រាវជ្រាវរកប្រភពនៃសត្វក្រពើ ថាតើមានមេក្រពើនៅក្នុងបឹងឬជាសត្វក្រពើរួចពីកន្លែងចិញ្ចឹមខាងក្រៅ ព្រោះកាលពីខែកក្កដា កន្លងទៅ ក៏មានកូនក្រពើ១ក្បាលបានជាប់លបអ្នកស្រុកដូចពេលនេះដែរ។
គួរបញ្ជាក់ថា បឹងខ្នារជាបឹងមួយស្ថិតក្នុងភូមិ ជេីងខ្នារ ឃុំពន្លៃ ស្រុកបរិបូណ៌ ខេត្តកំពង់ឆ្នាំង ។ កាលពីថ្ងៃទី១៩ ខែកក្កដា ឆ្នាំ២០២១ អ្នកស្រុកធ្លាប់ចាប់បានកូនក្រពើមួយក្បាលរួចម្តងមកហើយ ដោយកូនក្រពើនោះ បានជាប់ក្នុងលប។ ដោយឡែកនៅថ្ងៃទី២៩ ខែសីហា ក៏មានកូនក្រពើមួយក្បាលថ្មីបានមកជាប់ក្នុងលបអ្នកស្រុកទៀត ដោយអ្នកស្រុកខ្លះថា ក្រពើរួចពីកន្លែងចិញ្ចឹម ខ្លះទៀតថាសង្ស័យមានមេក្រពើនៅក្នុងបឹង៕ អត្ថបទ៖ និវឌ្ឍន៍
