កំពង់ឆ្នាំង ៖ នៅកិច្ចប្រជុំជាមួយអភិបាលរងខេត្ត និងថ្នាក់ដឹកនាំមន្ទីរ អង្គភាពជុំវិញខេត្ត នារសៀលថ្ងៃទី៧ ខែកក្កដាឆ្នាំ២០២១នេះ ឯកឧត្តម ស៊ុន សុវណ្ណារិទ្ធិ អភិបាលខេត្តកំពង់ឆ្នាំង បានដាក់ចេញនូវផែនការ ត្រៀមឆ្លើយតប ដើម្បីរទប់ស្កាត់ការឆ្លងរាលដាល នៃជំងឺកូវិដ .១៩ ។
ឯកឧត្តមអភិបាលខេត្ត បានមានប្រសាសន៍ ដោយលើកឡើងថា ស្ថានភាពជំងឺកូវិដ.១៩ ក្នុងខេត្តកំពង់ឆ្នាំង នៅមិនទាន់មានការថមថយនៅឡើយទេ។ បច្ចុប្បន្នមានករណីឆ្លងនៅតែបន្តកើនឡើងនិងមានអ្នកស្លាប់ជាបន្តបន្ទាប់ គួរឲ្យព្រួយបារម្ភ ។
ដើម្បីឆ្លើយតបទៅនឹងបញ្ហានេះ មន្ត្រីអាជ្ញាធរ និង អ្នកដែលពាក់ព័ន្ធទាំងអស់ ត្រូវរួមសហការគ្នារៀបចំបង្កើតមណ្ឌលចត្តាឡីស័កបន្ថែមទៀត ហើយទីតាំងមណ្ឌលចត្តាឡីស័កនិមួយៗ ត្រូវមានប្រព័ន្ធទឹក ភ្លើង និង កន្លែងស្នាក់នៅឲ្យបានសមរម្យ ។ ដោយឡែកមណ្ឌលសម្រាប់ព្យាបាលអ្នកជំងឺកូវិដ.១៩ ក៏ត្រូវរៀបចំបន្ថែមទៀតផងដែរ ។
ឯកឧត្តម ស៊ុន សុវណ្ណារិទ្ធិ អភិបាលខេត្តកំពង់ឆ្នាំង បានស្នើដល់ស្ថាប័នទាំងរដ្ឋនិងឯកជន ត្រូវមានវិធានការឲ្យបានម៉ឺងម៉ាត់បំផុត ក្នុងការចូលរួមទប់ស្កាត់ការឆ្លងរាលដាល នៃជំងឺកូវិដ.១៩ ។ នៅគ្រប់មូលដ្ឋាន ត្រូវបន្តចុះផ្សព្វផ្សាយដល់ប្រជាពលរដ្ឋឲ្យបានទូលំទូលាយ នូវវិធានការនានារបស់ក្រសួងសុខាភិបាល ពិសេសគឺ៣កុំ ៣ការពារ ឲ្យបានជាប់ជាប្រចាំ ។
សូមជម្រាបថា គិតត្រឹមថ្ងៃទី៧ ខែកក្កដាឆ្នាំ២០២១នេះ ខេត្តកំពង់ឆ្នាំង មាន អ្នកឆ្លង ជំងឺ កូវីដ .១៩ ក្នុងព្រឹត្តិការណ៍សហគមន៍ ២០កុម្ភៈ ចំនួន៧២៤នាក់ព្យាបាលជាសះស្បើយចំនួន៤៣៣នាក់ស្លាប់ចំនួន ១៦នាក់ និង កំពុងសម្រាកព្យាបាល ចំនួន២៧៥នាក់ ៕
