ក្រុម​គ្រូពេទ្យ​ជំនាញ​​ជំងឺ​កូវីដ​១៩​របស់​ប្រទេស​ចិន ​បាន​មក​ដល់​កម្ពុជា​

ដូ​ច​ការ​គ្រោងទុក ក្រុម​គ្រូពេទ្យ​ជំនាញ​​ជំងឺកូវីដ​១៩ របស់ប្រទេសចិន បានមក​ដល់​កម្ពុជា​ហើយ​ កាលពីនៅវេលាម៉ោងជាង​៨​ព្រឹក​​​ថ្ងៃទី២៣ ខែមីនានេះ តាមរយៈជើងយន្តហោះពិសេស ។ ក្រុមគ្រូពេទ្យដែលមកដល់កម្ពុជានេះ អាចចាត់​ទុកថា​ជាក្រុម​គ្រូពេទ្យ​ជំនួយទី១របស់ប្រទេសចិន មកកាន់ប្រទេសអាស៊ាន ខណៈដែលជំងឺកូវីដ១៩ កំពុងរាតត្បាតក្នុងតំបន់ និងទូទាំង​សកល​លោក ។

ឯកឧត្តម ម៉ម ប៊ុនហេង រដ្ឋមន្ត្រីក្រសួង​សុខាភិបាល​នៃ​កម្ពុជានិង​ឯកឧត្តម វ៉ាង វិ​ន​ធាន ឯកអគ្គរដ្ឋទូត​ចិនប្រចាំ​កម្ពុជា មាន​វត្តមាន​ក្នុង​ពិធី​បដិសណ្ឋារកិច្ចនៅ​ព្រលានយន្តហោះនាព្រឹកមិញនេះ​។

លោកវេជ្ជបណ្ឌិត លី សូវ៉ាន់ អ្នកនាំពាក្យក្រសួងសុខាភិបាល បានបញ្ជាក់ថា ក្រុមគ្រូពេទ្យដែលមកដល់កម្ពុជានេះ នឹងត្រូវ​ចែក​រំលែក​បទពិសោធន៍ និងបច្ចេកទេសជោគជ័យមួយចំនួនដែលធ្លាប់បានប្រើសម្រាប់ទប់ស្កាត់ការរីករាលដាលវិរុសកូវីដ-១៩ នៅប្រ​ទេសចិន​នោះ មកដល់មន្ត្រីជំនាញរបស់កម្ពុជា។

ជាមួយគ្នានោះ ឯកឧត្តម ម៉ម ប៊ុនហេង រដ្ឋមន្ត្រីក្រសួងសុខាភិបាលនៃកម្ពុជា ក៏បាន​ថ្លែង​អំណរ​គុណ​យ៉ាងជ្រាល​ជ្រៅនិង​ដោយ​ស្មោះ​ជូនចំពោះភាគី​ចិនដែលបានផ្តល់​ជំនួយដ៏ពិសេស​ដែលមាន​សារៈសំខាន់​​ចំពោះ​កិច្ចប្រយុទ្ធប្រឆាំងជម្ងឺវីរុស​COVID-19​ដល់កម្ពុជា។

គួរបញ្ជាក់ថា មុនការមកដល់ក្រុមគ្រូពេទ្យជំនាញព្យាបាលជំងឺកូវីដ១៩នេះ ប្រទេសចិន ក៏បានផ្តល់​ជំនួយជា​ថ្នាំសម្រាប់​ធ្វើ​តេស្ដ​​រ​កវីរុស​កូវីដ១៩ អាវពេទ្យសម្រាប់ការពារ ម៉ាសពេទ្យនិងម៉ាសពេទ្យធម្មតា ជូនមកកម្ពុជា ដើម្បីទុកការពារ​ទប់ស្កាត់​ការរីក​រាល​ដាលវិរុសកូវីដ-១៩ ក្រោយពេលកម្ពុជាចាប់ផ្តើមរកឃើញថាមានអ្នកផ្ទុកវិរុសកូវីដ-១៩ ជាបន្តបន្ទាប់៕

ព័ត៌មាន​ទាក់​ទង

ភ្ជាប់ទំនាក់ទំនងជាមួយ វិទ្យុ ម៉ាយអេហ្វអឹម ខេត្តកំពង់ឆ្នាំង