ស៊ីក្លូមានអាយុកាល ៨០ឆ្នាំ ដែលប្រើប្រាស់ក្នុងការថតរឿង”ដើម្បីកូន” បានប្រកាសដាក់លក់ក្នុងតម្លៃ ១លានដុល្លារ។ ក្នុងនោះទឹកប្រាក់ទទួលបាននឹងត្រូវប្រគល់ជូន មន្ទីរពេទ្យ គន្ធបុប្ផា។
កត្តាស៊ីក្លូនេះដាក់លក់ក្នុងតម្លៃ ១លានដុល្លារ ក៏ព្រោះតែជាកេរ្តិ៍តំណែលបន្សល់ទុកពីដូនតា តជំនាន់មក ដែលមានតម្លៃមិនអាចកាត់តម្លៃបាន។ នេះបើតាមការបញ្ជាក់ពីលោក ហ៊ុយ យ៉ាឡេង ផលិតកររឿង”ដើម្បីកូន” បានយកស៊ីក្លូនេះមកថតរឿងរបស់ខ្លួន មុនប្រកាសដាក់លក់នេះពេលនេះ។
លោក ហ៊ុយ យ៉ាឡេង បានបញ្ជាក់ថា៖”ក្រោយថតរឿងនេះចប់ជាមួយស៊ីក្លូដ៏ចំណាស់នេះធ្វើឱ្យខ្ញុំយល់កាន់តែច្បាស់ពីតម្លៃរបស់វាជួយជីវិតអ្នកធាក់ស៊ីក្លូ តជំនាន់នាពេលកន្លងមក។ អីចឹងហើយខ្ញុំជឿជាក់ថានឹងមានបណ្ដាអ្នកមានស្រុកខ្មែរ ឬខ្មែរអាណិកជននឹងលះបង់ទិញវាដើម្បីមន្ទីរពេទ្យ គន្ធបុប្ផា”។
ផលិតករល្បីឈ្មោះរូបនេះបន្តថា ស៊ីក្លូមួយនេះលោកបានទិញពីសមាគមស៊ីក្លូនៅភ្នំពេញក្នុងតម្លៃប្រមាណ៥រយដុល្លារ ដើម្បីថតរឿង”ដើម្បីកូន” ដែលជារឿងមួយដកស្រង់ពីសាច់រឿងពិតក្នុងសង្គមខ្មែរ ដែលឪពុកតស៊ូលះបង់គ្រប់បែបយ៉ាងដើម្បីចិញ្ចឹមកូន។ ក្រោយថតរឿងនេះចប់លោកបានកែច្នៃបន្ថែមឱ្យទៅជាពណ៌មាស មុនដាក់លក់ក្នុងតម្លៃ១លានដុល្លារនាពេលនេះ។ប្រការបែបនេះហើយទើបលោកសុំអំពាវនាវដល់សប្បុរសជនទាំងក្នុង និងក្រៅប្រទេសដែលមានលុយជួយទិញស៊ីក្លូមួយនេះផងដើម្បីជួយដល់កុមារកម្ពុជា។
” បើនៅរបទេសគេឲ្យតម្លៃខ្លាំងណាស់ គេដាក់ដេញថ្លៃបានលុយរាប់លាន ព្រោះវាជាសម្បត្តិបេតិកភណ្ឌមួយដែលមានអាយុកាល ៨០ឆ្នាំ។ នេះស្រុកខ្មែរលើកដំបូងហើយដែលខ្ញុំធ្វើអ៊ីចឹង មិនដឹងថាធ្វើទៅជះឥទ្ធិពលយ៉ាងណានោះទេដល់ប្រជាជនខ្មែរ។ លោក ហ៊ុយ យ៉ាឡេង បន្ថែម។
ចំពោះលុយ១លានដុល្លារនេះដែរគឺយើងយកទៅជួយមន្ទីរពេទ្យគន្ធបុប្ផាទាំងអស់”។
មួយវិញទៀតលោក បញ្ជាក់ថាប្រសិនបើបញ្ចាំងរឿង “ដើម្បីកូន” ចប់ហើយអត់មានអ្នកទិញស៊ីក្លូតម្លៃ១លានដុល្លារនេះទេ វិធីសាស្រ្ដតែមួយដែលខ្លួនអាចធ្វើទៅបាននោះគឺអំពាវនាវដល់ឧកញ៉ា ហុង ពីវ ឲ្យជួយទិញ ដែលលោកឧកញ៉ាជាវីរៈបុរសទី១ដែលជួយមន្ទីរពេទ្យគន្ធបុប្ផាមុនគេ៕
