ខេត្តកំពង់ចាម: នៅថ្ងៃចន្ទ ទី១៥ ខែកុម្ភ: ឆ្នាំ២០២១នេះ ក្រោមកិច្ចសហការរវាងក្រសួងអប់រំ យុវជន និងកីឡា និងអាជ្ញាធរជាតិប្រយុទ្ធប្រឆាំងគ្រឿងញៀន អង្គការភ្លែនអន្តរជាតិកម្ពុជា នៅមន្ទីរអប់រំ យុវជន និងកីឡា ខេត្តកំពង់ចាមមានបេីកវគ្គបណ្តុះបណ្តាលគ្រូឧទ្ទេសថ្នាក់ជាតិ ស្តីពីការប្រើប្រាស់សម្ភារឧបទ្ទេសសម្រាប់បង្រៀននិងរៀន សៀវភៅសិក្សា “ការបង្ការ ការទប់ស្កាត់គ្រោះថ្នាក់នានាបង្កដោយការប្រើប្រាស់គ្រឿងញៀនខុសច្បាប់” បានដំណើរការក្រោមអធិបតីភាពរបស់លោកជំទាវបណ្ឌិត សឿ សុជាតាអនុរដ្ឋលេខាធិការ ក្រសួងអប់រំ យុវជន និងកីឡា និងឯកឧត្តម នាយឧត្តមសេនីយ៍ មាស វីរិទ្ធ អគ្គលេខាធិការនៃអាជ្ញាធរជាតិប្រយុទ្ធប្រឆាំងគ្រឿងញៀន ដែលមានសិក្ខាកាមចូលរួមចំនួន២០នាក់។
លោកលី ម៉េងសាន ប្រធានមន្ទីរអប់រំ យុវជន និងកីឡាខេត្តកំពង់ចាម បានថ្លែងស្វាគមន៍និងរបាយការណ៍ពីភាពរីកចម្រេីនរបស់ខេត្តពិសេសលេីវិស័យអប់រំ យុវជន និងកីឡារបស់ខេត្តកំពង់ចាម ទទួលបានពានរង្វាន់សម្តេចតេជោហ៊ុន សែន ជានាយកល្អ សាលាស្អាត គ្រូល្អ គ្រូឆ្នេីម និងសិស្សស្មូតកំណាព្យ និងអានអត្ថបទ។ ចូលរួមបង្ការទប់ស្កាត់បញ្ហាគ្រឿងញៀនគ្រប់រូបភាពក្នុងសាលារៀន។
ឯកឧត្ដម នាយឧត្តមសេនីយ៍ មាស វិរិទ្ធ អគ្គលេខាធិការ នៃអាជ្ញាធរជាតិប្រយុទ្ធប្រឆាំងគ្រឿងញៀន មានប្រសាសន៍ថា បញ្ហាគ្រឿងញៀនមិនសញ្ញាថមថយទេ ទោះបីជាផ្ទៃដីដាំដំណាំអាភៀននៅតំបន់ត្រីកោណមាសមានការថយចុះ ការផលិតគ្រឿងញៀនធម្មជាតិថយចុះដែរ ប៉ុន្ដែការផលិតគ្រឿងញៀនសំយោគពីគីមីផ្សំមានការកេីនឡេីង។ ហេីយការបេីកវគ្គបំប៉នគ្រូឧទ្ទេសថ្នាក់ជាតិនៅពេលនេះគឺស្របនឹងយុទ្ធសាស្រ្តនិងការចង់បានបំផុត របស់ឯកឧត្តម ឧបនាយករដ្ឋមន្ត្រី កែ គឹមយ៉ាន ប្រធានអាជ្ញាធរជាតិប្រយុទ្ធប្រឆាំងគ្រឿងញៀន ដែលលោកចង់បានគ្រប់ក្រសួង–ស្ថាប័ន ត្រូវបន្តខិតខំបណ្តុះបណ្តាលជនបង្គោល គ្រូបង្គោល ដេីម្បីពង្រីកការងារផ្សព្វផ្សាយដល់ប្រជាពលរដ្ឋទូទៅអោយបានយល់ដឹងការចៀសចាកឆ្ងាយមិនទៅជិតគ្រឿងញៀនដែលនាំឱ្យមានមហន្តរាយដល់ខ្លួនឯង ក្រុមគ្រួសារ និងសង្គមជាតិ។
ថ្លែងក្នុងនាមឯកឧត្តម បណ្ឌិត ហង់ជួន ណារ៉ុនរដ្ឋមន្រ្តី ក្នុងឱកាសនោះ លោកជំទាវ បណ្ឌិត សឿ សុជាតា អនុរដ្ឋលេខាធិការ បានមានប្រសាសន៍ថ្លែងអំណរគុណដល់ឯកឧត្តមនាយឧត្តមសេនីយ៍កែ គឹមយ៉ាន ឧបនាយករដ្ឋមន្រ្តី និងជាប្រធានអាជ្ញាធរជាតិប្រយុទ្ធប្រឆាំងគ្រឿងញៀន ដែលជានិច្ចកាលគិតគូរដល់អនាគតរបស់យុវជនកម្ពុជាចៀសផុតពីគ្រោះថ្នាក់នានាបង្កដោយបញ្ហាគ្រឿងញៀន និងបានជួយគាំទ្រដល់ក្រសួងអប់រំ យុវជន និងកីឡា លើការផលិតសៀវភៅសិក្សាទាំង២កម្រិតភូមិសិក្សាសម្រាប់ការបង្រៀននិងរៀននៅតាមគ្រឹះស្ថានសិក្សាសាធារណ:និងឯកជន នៅទូទាំងប្រទេស។ មិនតែប៉ុណ្ណោះ ដោយមានការគាំទ្ររបស់ឯកឧត្តម ឧបនាយករដ្ឋមន្រ្តី កែ គឹមយ៉ាន ក្រសួងអប់រំ យុវជន និងកីឡា បានទទួលបានជំនួយពីឯកអគ្គរដ្ឋទូតចិន រៀបចំជាបណ្ណាល័យប្រឆាំងគ្រឿងញៀនសម្រាប់ការសិក្សាស្រាវជ្រាវបន្ថែមពីបញ្ហាពាក់ព័ន្ធគ្រោះភ័យបង្កដោតគ្រឿងញៀននៅក្នុងបណ្ណាល័យសម្តេចតេជោហ៊ុន សែន នៅរាជធានីភ្នំពេញ និងអាចឈានទៅបង្កើតបន្ថែមតាមខេត្តគោលដៅចំនួន៨ទៀតនាពេលខាងមុខនេះ។
ក្នុងឱកាសនោះដែរ លោកជំទាវបណ្ឌិត សឿ សុជាតា បានមានប្រសាសន៍បន្ថែមក្រសួងអប់រំ យុវជន និងកីឡា ដើម្បីសុវត្ថិភាពកុមារយុវជននិងសង្គមកម្ពុជាចៀសផុតពីគ្រឿងញៀនក៏បាននិងកំពុងពិនិត្យលទ្ធភាពស្វែងរកការគាំទ្រពីដៃគូរអភិវឌ្ឍន៍នានាធ្វើការរៀបរៀងសៀវភៅសិក្សាសម្រាប់កម្រិតមធ្យមសិក្សាទុតិយភូមិ ធ្វើការបោះពុម្ពសៀវភៅសិក្សាខាងលើសម្រាប់ការចែកចាយឲ្យបានទៅគ្រប់គ្រឹះស្ថានសិក្សា និងផលិតសៀវភៅនេះទៅជាវិធីបង្រៀនពីចម្ងាយដើម្បីចាក់ផ្សាយបន្ថែមដែលសាធារណជនអាចយល់ដឹងកាន់តែច្រើន និងអាចចូលរួមសកម្មក្នុងដំណើរការកសាងសហគមន៍នៅទូទាំងប្រទេសគ្មានគ្រឿងញៀន។
ជាមួយគ្នានេះ លោកជំទាវ បណ្ឌិត សឿ សុជាតា បានផ្តាំផ្ញេីគ្រូឧទ្ទេសទាំងអស់ត្រូវតែរួមសហការគ្នាធ្វេីការរួមគ្នាដេីម្បីឱ្យវគ្គបំប៉ននេះផ្តល់ចំណេះដឹង ជំនាញ និងសមត្ថភាពក្នុងការប្រើប្រាស់សម្ភារៈឧបទេសសម្រាប់ការរៀននិងបង្រៀន “ការបង្ការ ការទប់ស្កាត់គ្រោះថ្នាក់បង្កដោយការប្រើប្រាស់គ្រឿងញៀនខុសច្បាប់” នេះសម្រាប់យកទៅបង្រៀនបន្តដល់ក្រុមគោលដៅឱ្យមានប្រសិទ្ធភាព។
សូមបញ្ជាក់ថា វគ្គបំប៉នគ្រូឧទ្ទេសថ្នាក់ជាតិនេះ នឹងប្រព្រឹត្តទៅមានរយ:ពេល៥ថ្ងៃ ចាប់ពីថ្ងៃទី១៥ ដល់ ថ្ងៃទី១៩ ខែកុម្ភៈ ឆ្នាំ២០២១ ។
