រាជរដ្ឋាភិបាលជប៉ុន បានផ្តល់ជំនួយឥតសំណងប្រមាណជាង១១ម៉ឺនដុល្លារអាមេរិកដល់កម្ពុជាសម្រាប់ការអភិវឌ្ឍផ្លូវរត់អត្តពលកម្មចំនួន៨ខ្សែ នៅវិទ្យាស្ថានជាតិអប់រំកាយ និងកីឡា និងសាងសង់កន្លែងលាងដៃនៅក្នុងសាលារៀនចំនួន៦ នៅភាគខាងលិចនៃខេត្តស្ទឹងត្រែង។ ពិធីផ្តល់ជំនួយនេះបានចុះហត្ថលេខាដោយឯកឧត្តម មិកាមិ ម៉ាសាហ៊ីរ៉ូ ឯកអគ្គរាជទូតប្រទេសជប៉ុនប្រចាំនៅកម្ពុជាជាមួយភាគីទទួលជំនួយ នៅថ្ងៃទី០៥ ខែមីនា ឆ្នាំ២០២១ ភាគីទាំងពីរបានចុះហត្ថលេខាលើកិច្ចសន្យាផ្តល់ជំនួយ ដាច់ដោយឡែកពីគ្នា ដើម្បីចូលរួមក្នុងកិច្ចខិតខំប្រឹងប្រែងក្នុងការទប់ស្កាត់ ការរីករាលដាលចូលសហគមន៍នៃវីរុសកូវីត១៩ ដែលហៅថា “ព្រឹត្តិការណ៍សហគមន៍ ២០កុម្ភៈ”។
ឯកឧត្តម មិកាមិ ម៉ាសាហ៊ីរ៉ូ បានមានប្រសាសន៍ថា ទឹកប្រាក់ទាំងនេះត្រូវបានផ្តល់បែងចែកទៅឱ្យវិទ្យាស្ថានជាតិអប់រំ កាយ និងកីឡាចំនួន៩០,៦៤០ដុល្លារ សម្រាប់គម្រោងសាងសង់ផ្លូវរត់អត្តពលកម្មចំនួន៨ខ្សែនៅក្នុងវិទ្យាស្ថាននេះ ដើម្បីលើកកម្ពស់វប្បធម៌ និងការអប់រំថ្នាក់ឧត្តមសិក្សានៅកម្ពុជា។ គរុសិស្ស និងគ្រូប្រមាណ៤០០នាក់នៅវិទ្យាស្ថាននេះ និងសិស្សជាង៩៣ម៉ឺននាក់មកពីសាលារៀនជិតខាង នឹងអាចប្រើប្រាស់ផ្លូវរត់អត្តពលកម្មថ្មីនេះសម្រាប់ការប្រឡង និងព្រឹត្តិការណ៍កីឡាផ្សេងៗ ព្រមទាំងអាចទទួលបានការអប់រំកាយប្រសើរជាងមុន។
ឯកឧត្តម មិកាមិ ម៉ាសាហ៊ីរ៉ូ បានបន្តទៀតថា ចំណែកថវិកាចំនួន២៥,៥៣៤ដុល្លារទៀត ផ្តល់ទៅឱ្យមន្ទីរអប់រំ យុវជន និងកីឡាខេត្តស្ទឹងត្រែង សម្រាប់គម្រោងសាងសង់កន្លែងលាងដៃនៅក្នុងសាលារៀនចំនួន៦ នៅភាគខាងលិចនៃខេត្តស្ទឹងត្រែង ដែលមានសិស្សប្រមាណ៨៤០នាក់ និងគ្រូ៨០នាក់ ទទួលផលពីគម្រោងនេះ។
គួរបញ្ជាក់ថា ចាប់តាំងពីឆ្នំា១៩៩១ រដ្ឋាភិបាលជប៉ុនបានផ្តល់ថវិកាជាង៦៣លានដុល្លារអាមេរិកដល់អាជ្ញាធរមូលដ្ឋាន និងអង្គការ ក្រៅរដ្ឋាភិបាល ដើម្បីអនុវត្តគម្រោងគូសាណូណិចំនួន៦៤២គម្រោងនៅទូទាំងប្រទេសកម្ពុជា សំដៅចូលរួមចំណែកដោយផ្ទាល់ក្នុងការកែលម្អគុណភាពនៃជីវភាពរបស់ប្រជាជនកម្ពុជានៅកម្រិតមូលដ្ឋាន និងការលើកកម្ពស់វប្បធម៌ និងការអប់រំថ្នាក់ឧត្តមសិក្សានៅកម្រិតមូលដ្ឋាន៕
20
