ចម្ការកូនឈើដាំសម្រាប់ធ្វើមេពូជជាង ៤០ហិកតា ក្នុងចំណោម ៦០០ហិកតា នៅភូមិត្រពាំងថ្ម ឃុំឃុនរាម ស្រុកបន្ទាយស្រី ខេត្តសៀមរាប ត្រូវបានអគ្គីភ័យឆាបឆេះកាលពីយប់ថ្ងៃទី២១ ខែមករា ឆ្នាំ២០២០។ នេះបើតាមការអោយដឹងពីលោក សេង លន នាយសង្កាត់រដ្ឋបាលព្រៃឈើ កន្ទួតខ្នាក្រៅនៅថ្ងៃទី២២ ខែមករា ឆ្នាំ២០២០។
លោក សេង លន បានអោយដឹងបន្តថា ករណីអគ្គីភ័យនេះបានកើតឡើងចាប់ពីម៉ោង៤ល្ងាច ដល់ម៉ោង៩និង៥៥នាទីយប់ទើបពន្លត់បាន ទាំងស្រុង។ លោកបានបង្ហាញពីការព្រួយបារម្ភចំពោះបញ្ហាភ្លើងឆេះព្រៃនៅរដូវប្រាំងនេះ ដោយសារតែនៅក្នុងតំបន់នេះ មានចម្ការមេពូជឈើគ្រញូងជាច្រើនហិកតា ដែលមានសត្វព្រៃរស់នៅជាច្រើនប្រភេទ ហើយត្រូវបានជនខិលខូចព្យាយាមលួចកាប់និងដុតបំផ្លាញ។ លោកថា បើសិនជាមានករណីឆេះនៅក្នុងតំបន់អភិរក្សចម្ការមេពូជឈើគ្រញូងនេះ នឹងធ្វើឱ្យប៉ះពាល់យ៉ាងធ្ងន់ធ្ងរដល់ធនធានធម្មជាតិ ជាពិសេសគឺប្រភេទឈើកម្រ និងសត្វព្រៃ។
លោក បានបញ្ជាក់ទៀតថា បច្ចុប្បន្ននេះសង្កាត់រដ្ឋបាលព្រៃឈើកន្ទួតខ្នាក្រៅ ដែលស្ថិតនៅ ឃុំឃុនរាម ស្រុកបន្ទាយស្រី ខេត្តសៀមរាប បានប្រើប្រាស់វិធានការគ្រប់មធ្យោបាយដើម្បីទប់ស្កាត់ភ្លើងឆេះព្រៃនេះ ប៉ុន្តែលោកបានអំពាវនាវឱ្យប្រជាពលរដ្ឋទាំងអស់ចូលរួមការពារភ្លើងឆេះព្រៃនេះទាំងអស់គ្នា ប្រសិនជាគ្មានការចូលរួមពីប្រជាពលរដ្ឋទេ បញ្ហាភ្លើងឆេះព្រៃនេះ ប្រឈម និងមានការកើតឡើងខ្លាំង។
គួរបញ្ជាក់ថា នៅក្នុងស្រុកបន្ទាយស្រី ខេត្តសៀមរាប មានចម្ការមេពូជឈើគ្រញូងដែលដុះដោយធម្មជាតិជាច្រើនហិកតា ត្រូវបានអភិរក្ស និងមានចម្ការកូនឈើចម្រុះដាំឡើងវិញជាច្រើនទៀត ដែលត្រូវចូលរួមការពារទាំងអស់គ្នា៕
