ក្រសួងមហាផ្ទៃ ជួបតំណាងសង្គមស៊ីវិលនៅដើមសប្តាហ៍ក្រោយ ដើម្បីពិភាក្សាអំពីសំណើសុំធ្វើវិសោធនកម្មច្បាប់

ក្រសួង​មហា​ផ្ទៃ​បានជូន​ដំណឹង​នៅថ្ងៃ​នេះ​ថា ​ក្រសួង​ នឹង​បន្ត​រៀបចំ​កិច្ច​ប្រជុំ​ពិគ្រោះយោបល់ ​ជាមួយតំណាងអង្គការ សង្គមស៊ីវិល ដើម្បីពិនិត្យ និងពិភាក្សាលើខ្លឹម​សារ​ខាន់ៗ ពាក់ព័ន្ធនឹង ការស្នើសុំ​ធ្វើវិសោធន​កម្មច្បាប់​ ស្តីពី «សមាគម ​និង​អង្គការ​មិនមែនរដ្ឋាភិបាល របស់អង្គការ សង្គម​ស៊ីវិល​»។​ កិច្ចប្រជុំនេះ​នឹងធ្វើ​ឡើង​នៅថ្ងៃទី២០ ខែមករា ​ឆ្នាំ២០២០ ខាង​មុខនេះ វេលាម៉ោង​៨៖៣០នាទី ព្រឹក នៅសាល​ប្រជុំ​ក្រសួង​ម​ហាផ្ទៃ។

កិច្ចប្រជុំដូចគ្នានេះត្រូវបានរៀបចំធ្វើជាបន្តបន្ទាប់កាលពីឆ្នាំកន្លងទៅរវាងក្រុមការងាររបស់ ក្រសួងមហាផ្ទៃនិងតំណាងសង្គមស៊ីវិល។ ក្រុម​អង្គការ​​សង្គម​ស៊ីវិល​នៅ​ប្រទេស​កម្ពុជាកន្លង មក​ ទទូច​ឲ្យ​រដ្ឋាភិបាល​ជំរុញ​ឲ្យ​មាន​វិសោធនកម្ម​ច្បាប់​ស្តី​ពី​សមាគម​ និង​អង្គការ​មិនមែន​រដ្ឋា​ភិ​បាល​​​ដែល​ពួកគេយល់ថា​ មាន​លក្ខណៈ​រឹត​ត្បិត​ និង​ចរិត​ដាក់​គំនាប​ច្រើន​ជាង​សម្រប​សម្រួល និង​បង្កើន​ទំនាក់​ទំនង​ជាមួយ​រដ្ឋ​អំណាច។

ច្បាប់​ស្តីពី​ «សមាគម​ និង​អង្គការ​មិនមែន​រដ្ឋាភិបាល‍» ​ដែល​មាន​៩ជំពូក​ និង​៣៩​មាត្រា​ ត្រូវ​បាន​អនុម័ត​ដោយ​រដ្ឋ​សភា​ជាតិ​ កាលពី​ខែ​កក្កដា​ ឆ្នាំ​២០​១៥ បើទោះជាក្រុមសង្គមស៊ីវិលធ្លាប់ សម្តែងការមិនពេញចិត្តនៅត្រង់មាត្រាមួយចំនួនក្តី។ច្បាប់នេះត្រូវបានប្រកាសដាក់ឲ្យប្រើប្រាស់ កាល​ពី​អំឡុង​ខែសីហា ឆ្នាំ២០១៥ ។

ច្បាប់​​«សមាគម​ និង​អង្គការ​មិនមែន​រដ្ឋាភិបាល‍» មាន​គោលបំណង​ធានា​ការពារ​សិទ្ធិសេរីភាព​ក្នុងការ​​បង្កើត​សមាគមនិងអង្គការមែនរដ្ឋាភិបាល ​នៅ​​ក្នុង​​ព្រះរាជាណាចក្រ​កម្ពុជា ដើម្បី​ការពារ​ផលប្រយោជន៍​ស្របច្បាប់​របស់ខ្លួន និង​ការពារ​ផលប្រយោជន៍​សាធារណៈ ព្រមទាំង​​លើកកម្ពស់​កិច្ចសហ​ប្រតិបត្តិការ​ក្នុង​ភាពជា​ដៃគូ​រវាង​សមា​ម​និង​អង្គការ​មិនមែន​រដ្ឋាភិបាល​ជាមួយ​អាជ្ញាធរ​សាធារណៈ​។

យ៉ាងណាក៏ដោយក្រុមអង្គការសង្គមស៊ីវិលបានសម្តែងការមិនពេញចិត្តនៅត្រង់មាត្រាខ្លះនៃច្បាប់នេះនិងបានស្នើសុំឲ្យមានការធ្វើវិសោធនកម្មផងដែរ។ក្រោយពីទទួលបានសំណើពី ក្រុមសង្គមស៊ីវិល កន្លងមកក្រសួងមហាផ្ទៃធ្លាប់បានជួបតំណាងរបស់អង្គការទាំងនោះដើម្បីពិគ្រោះ​យោ​បល់​គ្នាទៅលើសំណើរបស់ពួយគេផងដែរកាលពីឆ្នាំកន្លងទៅ៕

ព័ត៌មាន​ទាក់​ទង

ភ្ជាប់ទំនាក់ទំនងជាមួយ វិទ្យុ ម៉ាយអេហ្វអឹម ខេត្តកំពង់ឆ្នាំង