កំពង់ឆ្នាំង ៖ កាលពីរសៀលថ្ងៃទី១២ ខែមករា ឆ្នាំ២០២០ កម្លាំងនគរបាលនៃអធិការដ្ឋាននគរបាលស្រុករលាប្អៀរ បានធ្វេីការឃាត់ខ្លួនជនសង្ស័យចំនួន២នាក់ បញ្ជូនទៅស្នងការដ្ឋាននគរបាលខេត្តកំពង់ឆ្នាំង ពីបទធ្វើឲ្យខូចខាតដោយចេតនា (គប់កញ្ចក់រថយន្ត) ។
ជនសង្ស័យដែលត្រូវសមត្ថកិច្ចចាប់ខ្លួន ទី១-ឈ្មោះ ខាត់ សុភក្តិ ភេទប្រុស អាយុ២៥ឆ្នាំ មានទីលំនៅភូមិថ្មី ឃុំជ្រៃបាក់ ស្រុករលាប្អៀរ និងទី២-ឈ្មោះ សែម សាន់ ភេទប្រុស អាយុ២០ឆ្នាំ មានទីលំនៅភូមិព្រៃពួច ឃុំជ្រៃបាក់ ស្រុករលាប្អៀរ ។
សមត្ថកិច្ច បានឲ្យដឹងថា កាលពីវេលាម៉ោង២១និង៣០នាទី ថ្ងៃទី១១ ខែមករា ឆ្នាំ២០២០ ជនសង្ស័យទាំង២នាក់ បានយកដុំថ្មគប់លើកញ្ចក់ទ្វារថយន្តម៉ាកលុចស៊ីសមួយគ្រឿងរបស់ ឈ្មោះ សួង រិទ្ធី ភេទប្រុស អាយុ៥០ឆ្នាំ មានទីលំនៅភូមិទី១ សង្កាត់ខ្សាម ក្រុងកំពង់ឆ្នាំង ខេត្តកំពង់ឆ្នាំងបណ្តាលឲ្យបែកកញ្ចក់ទ្វារ ខណះពេលដែលជនរងគ្រោះកំពុងបើករថយន្ត នៅតាមបណ្តោយផ្លូវជាតិលេខ៥ ត្រង់ចំណុចខាងមុខសាលា
បឋមសិក្សាជ្រៃបាក់ ស្ថិតក្នុងឃុំជ្រៃបាក់ ស្រុករលាប្អៀរ ខេត្តកំពង់ឆ្នាំង ។
ក្រោយពេលមានហេតុការណ៍កើតឡើង កម្លាំងនគរបាលស្រុករលាប្អៀរ បានធ្វើការស្រាវជ្រាវនិងឈានទៅកំណត់មុខសញ្ញាជនបង្ក ហើយធ្វើការឃាត់ខ្លួនយកមកសាកសួរតែម្តង ។ ជនសង្ស័យត្រូវបានបញ្ជូនមកកាន់ស្នងការដ្ឋាននគរបាលខេត្តកំពង់ឆ្នាំង ដើម្បីបន្តនិតិវិធី ៕
