អាជ្ញាធរជាតិអប្សរា ដោយមានការចូលរួមពីមន្ត្រីរដ្ឋបាលស្រុកបន្ទាយស្រី បានប្រគល់ប័ណ្ណសរសើរ ជូនប្រជាពលរដ្ឋ ចំនួន ៧គ្រួសារ នៅក្នុងតំបន់រមណីយដ្ឋានអង្គរ ដែលបានសាងសង់ផ្ទះខ្មែរបានត្រឹមត្រូវស្របតាមប្លង់ស្ថាបត្យកម្មដែលអាជ្ញាធរជាតិអប្សរាប្រគល់ជូន។ ពិធីនេះត្រូវបានរៀបចំឡើងនៅព្រឹកថ្ងៃព្រហស្បត្តិ៍ ៧រោច ខែមាឃ ឆ្នាំជូត ទោស័ក ព.ស ២៥៦៤ ត្រូវនឹងថ្ងៃទី០៤ ខែកុម្ភៈឆ្នាំ២០២១ នៅគេហដ្ឋានរបស់ប្រជាពលរដ្ឋដែលស្ថិតនៅភូមិព្រះដាក់ ឃុំព្រះដាក់ ស្រុកបន្ទាយស្រី។ 
ឯកឧត្តម យិត ចាន់ដារដ្ឋ អគ្គនាយករងនៃ អាជ្ញាធរជាតិអប្សរា ដែលបានអញ្ជើញជាអធិបតីនៅពេលនោះបានមានប្រសាសន៍ថា តាមគោលការណ៍របស់រាជរដ្ឋាភិបាលគឺអាជ្ញាធរជាតិអប្សរាកំពុងប្រឹងប្រែងលើកតម្លៃផ្ទះបែបខ្មែរដែលជាសម្បត្តិបេតិកភណ្ឌរូបីនិងបានចូលរួមបង្ហាញតម្លៃវប្បធម៌ដល់ភ្ញៀវទេសចរជាតិ អន្តរជាតិ និងមនុស្សជំនាន់ក្រោយឱ្យបានដឹងពីកេរដំណែលរបស់ដូនតាខ្មែរយើង។
ឯកឧត្តម បន្ថែមទៀតថារមណីយដ្ឋានអង្គរគឺជាតំបន់វប្បធម៌នៃអត្តសញ្ញាណរបស់ជាតិខ្មែរ ដូច្នេះប្រជាពលរដ្ឋយើងដែលកំពុងរស់នៅក្នុងតំបន់នេះត្រូវចូលរួមថែរក្សា លើកតម្លៃវប្បធម៌របស់យើង ដែលជាបេតិកភណ្ឌវប្បធម៌នៃមនុស្សជាតិ។
ទន្ទឹមនេះដែរ ប្រជាពលរដ្ឋដែលជាម្ចាស់ផ្ទះបានសម្តែងអារម្មណ៍ត្រេកអរ ដោយមិននឹកស្មានថា ផ្ទះរបស់ពួកគាត់ត្រូវបានអាជ្ញាធរជាតិអប្សរា និងរដ្ឋបាលស្រុកបន្ទាយស្រីចាត់ទុកជាផ្ទះគំរូ ហើយទទួលបានប័ណ្ណសរសើរថែមទៀតផង។ ពួកគាត់ក៏សូមថ្លែងអំណរគុណចំពោះអាជ្ញាធរជាតិអប្សរា និងរដ្ឋបាលស្រុកបន្ទាយស្រីដែលបានប្រគល់ប័ណ្ណសរសើរដល់ពួកគាត់នាពេលនេះ និងសូមអំពាវនាវដល់បងប្អូនប្រជាពលរដ្ឋផ្សេងទៀតដែលកំពុងរស់នៅក្នុងឧទ្យានអង្គរ ប្រសិនបើមានគម្រោងសង់ផ្ទះសូមទៅដាក់ពាក្យស្នើសុំសាងសង់ និងសង់ផ្ទះតាមគំរូផ្ទះខ្មែរស្របតាមការណែនាំរបស់អាជ្ញាធរជាតិអប្សរា។
គួរបញ្ជាក់ផងដែរថា អាជ្ញាធរជាតិអប្សរាមានគម្រោងចុះប្រគល់ជូនប័ណ្ណសរសើរដល់ប្រជាពលរដ្ឋក្នុងឧទ្យានអង្គរនៅស្រុកអង្គរធំ និងស្រុកប្រាសាទបាគង ដែលបានសាងសង់ផ្ទះខ្មែរបានត្រឹមត្រូវនៅពេលឆាប់ៗខាងមុខនេះទៀត៕
ប្រភព៖ អាជ្ញាធរជាតិអប្សរា
