ដោយជំងឺកូវីដ១៩ បាននឹងកំពុងកើតមានបន្តនៅទូទាំងពិភពលោករាប់ទាំងកម្ពុជា នៅថ្ងៃទី២៦ ខែមករា ឆ្នាំ២០២១នេះ សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានប្រកាសបន្តកាត់ប្រាក់បៀវត្សក្រោយការបង់ពន្ធលើបៀវត្សជូនរដ្ឋ រយៈពេល៧ខែទៀត ជូនក្រសួងសុខាភិបាល ដើម្បីចូលរួមជួយដល់ការប្រយុទ្ធប្រឆាំងកូវីដ ១៩ ដោយគិតចាប់ពីខែកុម្ភះ ដល់ ខែសីហា ឆ្នាំ២០២១។
នៅលើទំព័រហ្វេកបុក(facebook) សម្តេចតេជោ ហ៊ុន សែន បានលើកឡើងថា ដើម្បីចូលរួមជួយដល់ការប្រយុទ្ធប្រឆាំងកូវីដ ១៩ ក្នុងឆ្នាំកន្លងទៅ សម្តេចបានកាត់ប្រាក់បៀវត្សទាំងអស់ក្រោយការបង់ពន្ធលើបៀវត្សជូនរដ្ឋរយះពេល៧ខែជូនទៅក្រសួងសុខាភិបាល។
សម្តេចតេជោ បានលើកឡើងបន្តថា ប្រាក់បៀវត្សរបស់សម្តេច ១០លានរៀលក្នុងមួយខែ ត្រូវបង់ពន្ធ៩១០.០០០រៀលក្នុងមួយខែ និងប្រគល់ជូនក្រសួងសុខាភិបាល ៩.០៩០០.០០០រៀលក្នុងមួយខែសរុប៧ខែ ចំនួន៦៣.៦៣៩.០០០រៀល។
សម្តេចតេជោ ហ៊ុន សែន ក៏បានថ្លែងអំណរគុណចំពោះ សម្តេច ឯកឧត្តម លោកជំទាវ លោក លោកស្រី ទាំងស្ថាបន័ស៊ីវិលនិងកម្លាំងប្រដាប់អាវុធគ្រប់ប្រភេទដែលបានបរិច្ចាគដោយការកាត់បៀវត្សទាំងស្រុងឬមួយផ្នែករយះពេលខ្លីឬវែងតាមការស្ម័គ្រចិត្តជួយដល់ការងារប្រយុទ្ធប្រឆាំងកូវីដ១៩ ដែលបង្ហាញឱ្យឃើញនូវសាមគ្គីភាពក្នុងខឿនការពារសុខភាពរបស់ប្រជាជនកម្ពុជា ៕
