កំពង់ឆ្នាំង ៖ មនុស្ស២នាក់បានស្លាប់ភ្លាមៗនៅនឹងកន្លែង នៅក្នុងឧប្បត្តិហេតុគ្រោះថ្នាក់ចរាចរណ៍មួយ ដែលបង្កឡើងដោយរថយន្តមួយគ្រឿងបើកវ៉ាជែងគ្នា ។ ហេតុការណ៍គ្រោះថ្នាក់ចរចរ៍ណ៍នេះបានកើតឡើងកាលពីវេលាម៉ោងជាង១រសៀល ថ្ងៃទី៦ ខែធ្នូ ឆ្នាំ២០២០ នៅចន្លោះគីឡូម៉ែត្រលេខ២០ និង ២១ ស្ថិតក្នុងភូមិសាស្រ្ត ភូមិត្រពាំងព្រីង ឃុំអភិវឌ្ឍន៍ ស្រុកទឹកផុស ខេត្តកំពង់ឆ្នាំង ។
សមត្ថកិច្ចបានឲ្យដឹងថា ជនរងគ្រោះដែលស្លាប់នៅក្នុងឧប្បត្តិហេតុគ្រោះថ្នាក់ចរាចរណ៍នេះ ម្នាក់ឈ្មោះផ្លុង វិត ភេទប្រុស អាយុ៤១ឆ្នាំ និង អ្នករួមដំណើរម្នាក់ទៀតឈ្មោះហន ហួយ ភេទប្រុស អាយុ៤០ឆ្នាំ អ្នកទាំងពីររស់នៅភូមិត្រពាំងព្រីង ឃុំអភិវឌ្ឍន៍ ស្រុកទឹកផុស ខេត្តកំពង់ឆ្នាំង ។
សមត្ថិច្ចបានឲ្យដឹងថា នៅមុនពេលកើតហេតុ ជនរងគ្រោះបានជិះម៉ូតូមួយគ្រឿង ម៉ាកហុងដាសេ១២៥ ពាក់ស្លាកលេខកំពង់ឆ្នាំង 1E-00 51 ធ្វើដំណើរក្នុងទិសដៅ ពីជើងទៅត្បូង ឌុបគ្នា២នាក់ បំរុងបត់ឆ្វេងចូលផ្ទះ នៅពេលមកដល់កន្លែងកើតហេតុក៏មានរថយន្តមួយគ្រឿងម៉ាកតូយ៉ូតា ហាយឡិនឌ័រ ពាក់ស្លាកលេខ2B-5193 ធ្វើដំណើរស្របទិសគ្នា បានបើកវ៉ាជែងនឹងរថយន្តមួយគ្រឿងនៅពីមុខក៏បានជ្រុលទៅបុកម៉ូតូពេញមួយទំហឹងតែម្តង បណ្តាលឲ្យជនគ្រោះប៉ើងចេញម៉ូតូស្លាប់ទាំង២នាក់ភ្លាមនៅកន្លែងកើតហេតុ ។
ក្រោយពេលកើតហតុម្ចាស់រថយន្តបានរត់គេចខ្លួន បន្សល់ទុករថយន្តនៅនឹងកន្លែងកើតហេតុ ចំណែកសាកសពត្រូវបានប្រគល់ឲ្យក្រុមគ្រួសារដើម្បីយកទៅរៀបចំធ្វើបុណ្យតាមប្រពៃណី ។ ចំណែកមធ្យោបាយបង្ករទាំងពីរត្រូវបានសមត្ថកិច្ចយកទៅរក្សាទុកនៅអធិការដ្ឋាននគរបាលស្រុកទឹកផុស ដើម្បីដោះស្រាយតាមនីតិវិធី ។
