អ្នក​​ពុល​ស្រា​មាន​សារ​ធាតុ​មេតាណុល​នៅស្រុកទឹកផុស កើន​ឡើង​ដល់១០១​នាក់ ក្នុងនោះ​ស្លាប់៤នាក់

កំពង់ឆ្នាំង ៖ គិត​ត្រឹមព្រឹក​ម៉ោង១០​និង៣​០នាទី ថ្ងៃទី​២៩ ខែ​វិច្ឆិកា ឆ្នាំ២០២០​ អ្នក​ពុលស្រាមានសារធាតុមេតាណុល នៅ​ស្រុក​ទឹក​ផុស ខេត្ត​កំពង់​ឆ្នាំង បាន​កើនឡើងដល់​ចំនួន​ ១០១​នាក់​ហើយ ខណះ​មានអ្នក​ស្លាប់​២នាក់​ពេលបញ្ជូន​ទៅភ្នំពេញ និង២នាក់​ទៀត​ស្លាប់​នៅមូលដ្ឋាន។ នេះបើ​តាម​របាយកា​រណ៍បឋមស្តីពីការពុលស្រាមានសារធាតុមេតាណុល​ ដែលលោកវេជ្ជបណ្ឌិត ទុំ សម្បត្តិ  គោរព​ជូន​ឯកឧត្តម​រដ្ឋមន្ត្រី​ក្រសួងសុខាភិបាល។

​របាយកា​រណ៍ បានបង្ហាញថា នៅព្រឹកថ្ងៃទី២៩ ខែវិច្ឆិកានេះ មានអ្នកជំងឺដែលសង្ស័យថាពុលស្រាស ចំនួន៣៥នាក់​បន្ថែមទៀត​ត្រូវ​បាន​​បញ្ជូនមកកាន់មន្ទីរពេទ្យបង្អែកខេត្តកំពង់ឆ្នាំង ធ្វើឲ្យចំនួនអ្នកជំងឺកើនដល់១០១នាក់ ។ក្នុងនោះ​មាន​អ្នកជំងឺ​២នាក់​បាន​ស្លាប់​ពេល​​បញ្ជូនទៅភ្នំពេញ​និង២នាក់ទៀតស្លាប់​នៅមូលដ្ឋាន​តែម្តង ។

ករណីនេះក្រសួងសុខាភិបាល នៅយប់ថ្ងៃទី២៨ ខែវិច្ឆិកា បានចាត់ក្រុមការងារមួយក្រុម ដើម្បីសហការជាមួយអាជ្ញាធរមូលដ្ឋាន​ចុះពិនិត្យ និងដោះស្រាយបន្ទាន់នូវករណីពុលស្រាសនេះ និងបានអំពាវនាវប្រជា​ពល​រដ្ឋកុំ​ពិសា​ស្រាស ដែលរៀបចំ​គ្មាន​បច្ចេកទេសត្រឹមត្រូវ ដើម្បីចៀសផុតពីការពុល ដែលធ្វើឲ្យបាត់បង់​ជីវិត។

គួរបញ្ជាក់ថា កាលពីវេលាម៉ោងប្រមាណជាង៤ រសៀលថ្ងៃទី២៨ ខែវិច្ឆិកា ឆ្នាំ២០២០ មានមនុស្សប្រុស ស្រីជាច្រើន​នាក់ នៅ​ស្រុក​ទឹក​ផុស ខេត្តកំពង់ឆ្នាំង ត្រូវបានដឹកមកសង្រ្គោះបន្ទាន់មន្ទីរពេទ្យខេត្តកំពង់ឆ្នាំង ជាបន្តបន្ទាប់ ដោយសារពួក​គាត់​មាន​អាការ​:​ឈឺ​ក្បាល​ វិលមុខ តឹងទ្រូង ថប់ដង្ហើម និង ក្អួតចង្អោរយ៉ាងខ្លាំង ក្រោយពីពួកគាត់នាំគ្នាផឹកស្រាស និង ស្រាថ្នាំ ពេលកំដរបុណ្យសព ។ ដោយឡែក អ្នកដែលមានអាការៈធ្ងន់ធ្ងរបានបញ្ជូនបន្តទៅសង្រ្គោះនៅភ្នំពេញ ៕

ព័ត៌មាន​ទាក់​ទង

ភ្ជាប់ទំនាក់ទំនងជាមួយ វិទ្យុ ម៉ាយអេហ្វអឹម ខេត្តកំពង់ឆ្នាំង