កំពង់ឆ្នាំង៖ កម្លាំងនៃអធិការដ្ឋាននគរបាលក្រុងកំពង់ឆ្នាំង កាលថ្ងៃទី៣០ ខែកញ្ញា ឆ្នាំ២០២០ បានឃាត់ខ្លួនសង្ស័យ២នាក់ រួមជាមួយដាវកែច្នៃចំនួនពីរដើម នៅក្នុងក្រុងកំពង់ឆ្នាំង ខេត្តកំពង់ឆ្នាំង។
នគរបាលក្រុងកំពង់ឆ្នាំង បានអោយដឹងថា ខណៈកម្លាំងនគរបាល ចេញល្បាតក្នុងភូមិសាស្ត្រក្រុងកំពង់ឆ្នាំង តាមទីសាធារណៈសួនកម្សាន្ត និងកន្លែងស្មុគស្មាញនានា លុះមកដល់ចំណុចសួនសម្ដេចចៅហ្វាយវាំង ក៏បានជួបជាមួយនឹងក្មេងទំនើងមួយក្រុមមានគ្នា ០៣ នាក់ជិះម៉ូតូមួយគ្រឿង ប្រដាប់ដោយដាវកែច្នៃចំនួន ០២ដើម ។
ពេលនោះកម្លាំងនគរបាលបានធ្វើការឃាត់និងជិះកាត់ជនសង្ស័យឲ្យឈប់ ប៉ុន្តែជនសង្ស័យក៏បានជិះម៉ូតូបម្រុងរត់គេចខ្លួនពេលនោះសមត្ថកិច្ចក៏បានធ្វើការឃាត់ខ្លួនបានជនសង្ស័យចំនួន ០២ នាក់ដកហូតបានដាវកែច្នៃចំនួនពីរដើម ម៉ូតូមួយគ្រឿងដែលជាមធ្យោបាយធ្វើដំណើរ ចំណែកជនសង្ស័យម្នាក់ទៀតបានរត់គេចខ្លួន។
ជនសង្ស័យទាំង ០២នាក់រួមមានទី១ឈ្មោះ សួន ភាលី ភេទប្រុស អាយុ ២០ ឆ្នាំ ទីលំនៅ ភូមិអាទាំង ឃុំភូមិធំ ស្រុកកៀនស្វាយ ខេត្តកណ្តាល បច្ចុប្បន្នស្នាក់នៅភូមិ ម៉ុងបារាំង សង្កាត់ប្អេរ ក្រុងកំពង់ឆ្នាំង និងទី២ ឈ្មោះ ឌឹម ផាន់ណា ភេទប្រុស អាយុ ២២ ឆ្នាំ ទីលំនៅ ភូមិអាទាំង ឃុំភូមិធំ ស្រុកកៀនស្វាយ ខេត្តកណ្តាល បច្ចុប្បន្នស្នាក់នៅភូមិម៉ុងបារាំង សង្កាត់ប្អេរ ក្រុងកំពង់ឆ្នាំង ។
បច្ចុប្បន្នជនសង្ស័យទាំងពីរនាក់ខាងលើត្រូវបានឃាត់ខ្លួននៅអធិការដ្ឋាននគរបាលក្រុងកំពង់ឆ្នាំងដើម្បីកសាងសំណុំរឿងតាមនីតិវិធី ៕
