កំពង់ឆ្នាំង ៖ ស្ត្រី២នាក់បានរងរបួសធ្ងន់ ដោយសារគ្រោះថ្នាក់ចរាចរណ៍រវាងរថយន្តនិងម៉ូតូ ។ ហេតុការណ៍គ្រោះថ្នាក់ចរាចរណ៍នេះកើតឡើងកាលពីវេលាម៉ោង៦និង៣០នាទីព្រឹកថ្ងៃទី៨ ខែកញ្ញា ឆ្នាំ២០២០នៅលើផ្លូវជាតិលេខ៥ ចន្លោះគីឡូម៉ែត្រលេខ៤៣.៤៤ ស្ថិតក្នុងភូមិជន្លាត់ដៃ ឃុំស្វាយ ស្រុកសាមគ្គីមានជ័យ ខេត្តកំពង់ឆ្នាំង ។
ប្រភពពីសមត្ថកិច្ច បានឲ្យដឹងថា រថយន្តបង្កម៉ាក HYUNDAI ពណ៌ខៀវ ពាក់ស្លាកលេខកំពង់ឆ្នាំង 3A.0357 បើកបរដោយឈ្មោះ មាស រី ភេទប្រុស អាយុ ៥០ឆ្នាំ រស់នៅភូមិច្រកសង្កែរ ឃុំស្វាយជុក ស្រុកសាមគ្គីមានជ័យ ខេត្តកំពង់ឆ្នាំង ។ បើកបរក្នុងទិសដៅពីទិសត្បូងទៅជើង (ច្រាស់ទិសគ្នា) លុះពេលបេីកបរមកដល់ចំណុចខាងលើក៏បានទៅបុកម៉ូតូ១គ្រឿងម៉ាក HONDA C១២៥ ពាក់ស្លាកលេខ ភ្នំពេញ1GR.43 06 បេីកបរដោយឈ្មោះ ធន់ គន្ធា ភេទស្រី អាយុ២២ឆ្នាំ រស់នៅភូមិបឹងលាជ ឃុំសេដ្ឋី ស្រុកសាមគ្គីមានជ័យ ខេត្តកំពង់ឆ្នាំង បណ្តាលអោយរងរបួសធ្ងន់និងអ្នករួមរួមដំណើរឈ្មោះទួង ស្រីស្រស់ ភេទស្រី អាយុ២៦ឆ្នាំ រស់នៅភូមិឃុំជាមួយគ្នា រងរបួសធ្ងន់ ។
ក្រោយពេលកើតហេតុ ត្រូវបានគេបញ្ជូនទៅព្យាបាលនៅមន្ទីរពេទ្យ រីឯជនបង្កបានរត់គេចខ្លួន៕
