អនុ​គណ​កម្មការ​សុវត្ថិភាព​ចរាចរណ៍​ខេត្តកំពង់​ឆ្នាំង ចុះផ្សព្វ​ផ្សាយ​អប់រំ​ច្បាប់​​ចរាចរណ៍​ផ្លូវ​គោក ក្នុង​ឱកាស​បុណ្យ​កាន់​បិណ្ឌ​និង​បុណ្យ​ភ្ជុំ​បិណ្ឌ

កំពង់ឆ្នាំង ៖ អនុគណកម្មការសុវត្ថិភាពចរាចរណ៍ខេត្តកំពង់ឆ្នាំង ព្រឹកថ្ងៃទី៧ ខែកកញ្ញា ឆ្នាំ២០២០នេះ បានបើកយុទ្ធនាការអប់រំ ផ្សព្វផ្សាយ​ស្តីពី​ច្បាប់​ចរាចរណ៍ផ្លូវគោក ដល់ប្រជាពលរដ្ឋដែលជាអ្នកប្រើប្រាស់ផ្លូវ នៅក្នុងមូលដ្ឋានក្រុងកំពង់ឆ្នាំង ក្រោមអធិបតីភាព ឯកឧត្តម កែវ ពៅ ទី​ប្រឹក្សា​​ក្រសួងសាធារណការនិងដឹកជញ្ជូន និង លោក ឆាយ​ លាភា ប្រធានមន្ទីរសាធារណការនិងដឹកជញ្ជូន​ខេត្តកំពង់​ឆ្នាំង ។

លោក ឆាយ លាភា ប្រធានមន្ទីរសារធាណៈការនិងដឹកជញ្ជូនខេត្តកំពង់ឆ្នាំង បានបញ្ជាក់ថា អនុវត្តតាមការណែនាំ​របស់​ឯកឧត្តម​ទេសរដ្ឋមន្រ្តី ស៊ុន ចាន់ថុល រដ្ឋមន្រ្តីក្រសួងសារធារណការ និង ដឹកជញ្ជូន និង ឯកឧត្តមអភិបាលខេត្តកំពង់ឆ្នាំង ក្នុងការរឹតបន្តឹងការអនុវត្តច្បាប់ចរាចរណ៍​ផ្លូវ​គោក ក៏ដូចជាដាស់ស្មារតីឲ្យប្រជាពលរដ្ឋចូលរួមគោរពច្បាប់ចរាចរណ៍ឲ្យបានច្រើនក្នុងពិធីបុណ្យជាតិធំៗ។

នៅក្នុងឱកាសបុណ្យកាន់បិណ្ឌ និង ភ្ជុំបិណ្ឌនេះ គណៈកម្មាធិការជាតិសុវត្ថិភាពចរាចរណ៍ផ្លូវគោក បានចុះធ្វើយុទ្ធនាការផ្សព្វផ្សាយ និង អប់រំ​អំពី​សុវត្ថិភាពចរាចរណ៍ នៅតាមចំណតរថយន្ត ទីប្រជុំជន និង ផ្លូវជាតិសំខាន់ៗស្តីពីច្បាប់ចរាចរណ៍ផ្លូវគោក និង ចុះរឹតបន្តឹងការអនុវត្តច្បាប់​​ចរា​ចរ​ណ៍​​ក្នុងភូមិសាស្រ្តខេត្តកំពង់ឆ្នាំង ដើម្បីធានាអោយអត្រាគ្រោះថ្នាក់ចរាចរណ៍នៅកម្រិតទាបបំផុត ។

លោកប្រធានមន្ទីរ បានបញ្ជាក់ទៀតថា ករណីគ្រោះថ្នាក់ចរាចរណ៍អាចនឹងកើនឡើងខ្ពស់ក្នុងឱកាស នៃពិធីបុណ្យជាតិធំៗ ដោយសារក្នុង​ពេល​នេះ កំណើននៃការប្រើប្រាស់ផ្លូវមានច្រើន ។ ដូច្នេះត្រូវចូលរួមគោរពច្បាប់ចរាចរណ៍ទាំងអស់គ្នាដើម្បីឈានទៅកាត់បន្ថយអត្រាគ្រោះថ្នាក់​ចរា​ចរណ៍ឲ្យនៅកម្រិតទាប និង ទប់ស្កាត់ការបាត់បង់អាយុជីវិតរបស់ប្រជាពរដ្ឋដែលបង្កឡើងដោយកត្តាហានិភ័យនេះ។

លោក ឆាយ លាភា បានបញ្ជាក់ទៀតថា មុននឹងបើកបរត្រូវត្រួតពិនិត្យលក្ខណៈបច្ចេកទេសយានយន្តជានិច្ច ពិសេសត្រួតពិនិត្យកង់ ចង្កូតហ្វ្រាំង ភ្លើងបំភ្លឺ ជាដើម។ ជាមួយគ្នានេះក៏កុំផ្ទុកអ្នកដំណើរឬទំនិញលើសកម្រិតកំណត់។ ត្រូវពាក់មួកសុវត្ថិភាពក្នុងពេល​ធ្វើដំណើរតាមទោចក្រ​យាន​យន្ត,ត្រូវពាក់ខ្សែក្រវាត់សុវត្ថិភាពជានិច្ចក្នុងពេលធ្វើដំណើរតាមរថយន្ត,ត្រូវគោរពសិទ្ធិអាទិភាព គោរពសញ្ញាចរាចរណ៍ និងប្រកាន់ស្តាំជានិច្ច ។

នៅក្នុងឱកាសនោះ អនុគណកម្មការសុវត្ថិភាពចរាចរណ៍ បានផ្តល់សំណួរដល់ប្រជាពលរដ្ឋ ដើម្បីឆ្លើយយក មួកសុវត្ថិភាពផង​ដែរ ប្រជាពល​រដ្ឋ​ដែលបាន​ឆ្លើយសំណួរបានត្រូវចំនួន៦០មួកផងដែរ ៕

ព័ត៌មាន​ទាក់​ទង

ភ្ជាប់ទំនាក់ទំនងជាមួយ វិទ្យុ ម៉ាយអេហ្វអឹម ខេត្តកំពង់ឆ្នាំង