កំពង់ឆ្នាំង ៖ សិស្សានុសិស្សនៅតាមសាលានានានៅក្នុងខេត្តកំពង់ឆ្នាំង បានចូលរៀនវិញហើយបន្ទាប់ពីអាក់ខាន ការសិក្សាមួយរយៈដោយសារបញ្ហានៃការរីករាលដាលនៃជំងឺកូវីដ១៩ នេះបើតាមការបញ្ជាក់តាមរយៈទូរស័ព្ទរបស់លោក ស៊ឹម ប្រឹម ប្រធានមន្ទីរអប់រំយុវជននិងកីឡា ខេត្តកំពង់ឆ្នាំង កាលពីព្រឹកថ្ងៃទី ៧ ខែកញ្ញា ឆ្នាំ២០២០ នេះ ។
លោកប្រធានមន្ទីរ បានឲ្យដឹងថា នៅតាមសាលានីមួយនៅក្នុងខេត្តកំពង់ឆ្នាំង គឺបានរៀបចំសំអាត បរិស្ថាន អនាម័យបានល្អប្រសើរ គឺអនុវត្តតាមការណែនាំជាចំបងរបស់ក្រសួងអប់រំយុវជននិងកីឡា ដោយធានាថាសិស្សានុសិស្សដែលបានចូលរៀននាពេលនេះ មានសុវត្ថិភាពល្អ ។ នៅតាមសាលានីមួយៗក្នុងខេត្តនេះ គឺបានត្រួតពិនិត្យបានច្បាស់លាស់ ដែលសាលាមានឧបករណ៍ពិនិត្យកំដៅ មានទឹកអាល់កុលបាញ់សំអាតដៃ និង ពិនិត្យមើលសិស្សដែលពុំបានពាក់ម៉ាស់ គឺសាលាតម្រូវឲ្យសិស្សពាក់ម៉ាស់ជាមុនសិនបានអនុញ្ញាឲ្យចូលសាលា ក្រៅពីនេះ បែងចែកវេនសិក្សាតាមតាមការកំណត់របស់ក្រសួង ។
ជាមួយគ្នានេះ លោកប្រធានមន្ទីរ ក៏ផ្តាំផ្ញើឲ្យអណាព្យាបាលទាំងអស់បង្កើនការយកចិត្តទុកដាក់និងតាមដាន សុខភាពកូនឲ្យបានជាប់ជាប្រចាំ ទាំងមុនពេលចេញពីផ្ទះ និងពេលត្រឡប់មកពីសាលា ពិសេគឺប្រកាន់ភ្ជាប់អនាម័យជាប្រចាំ ។ សម្រាប់សាលានៅខេត្តកំពង់ឆ្នាំង គឺមិនមានបញ្ហាអ្វីនោះទេ ដោយសារសិស្សានុសិស្សគោរពបានតាមការណែនាំបានល្អ គឺពាក់ម៉ាស់ គ្រប់គ្នាពេលចូលទៅសាលារៀន និង រក្សាគម្លាតសុវត្ថិភាពបានល្អពេលចូលសិក្សាតាមថ្នាក់រៀន ។
