កំពង់ឆ្នាំង៖ នៅថ្ងៃទី៣០ ខែកក្កដា ឆ្នាំ២០២០នេះ សាខាមូលនិធិជនពិការ សហការជាមួយមន្ទីរសង្គមកិច្ច អតីតយុទ្ធជន និង យុវនីតិសម្បទាខេត្តកំពង់ឆ្នាំង បាននាំយកអំណោយចែកជូនដល់ជនមានពិការភាពចំនួន២២នាក់ រស់នៅក្នុងខេត្តកំពង់ឆ្នាំង ដែលមានប័ណ្ឌសមធម៌ ។
លោក សួស គឹមថុន ប្រធានសាខាមូលនិធិជនពិការខេត្តកំពង់ឆ្នាំង បានអោយដឹងថា សាខាមូលនិធិជនពិការ បានទទួលហិបសប្បុរសធម៌មូលនិធិជនពិការមានចំនួន៣៥ហិប ដោយបានសហការជាមួយមន្ទីរសង្គមកិច្ច អតីតយុទ្ធជន និងយុវនីតិសម្បទាខេត្តកំពង់ឆ្នាំង ហើយបានយកទៅដាក់តាមទីតាំងនានាក្នុង ក្រុងកំពង់ឆ្នាំង និង ស្រុករលាប្អៀរ ដែលបានដាក់តាវត្តអារាម ភោយនីយដ្ឋាន និង ទីកំសាន្តនានា ហើយក្នុងមួយឆ្នាំៗប្រមូលបានសាច់ប្រាក់ប្រហែលជាង ៥លានរៀល ។ ហើយកន្លងមកសាខាមូលនិធិជនពិការខេត្តកំពង់ឆ្នាំង ក៏បានសហការជាមួយឯកជន រៀបចំការប្រគុំតន្ត្រី សប្បុរសធម៌មូលនិធិជនពិការ ដើម្បីធ្វើការផ្សព្វផ្សាយច្បាប់ស្ដីពីកិច្ចការពារ និងលើកកម្ពស់សិទ្ធិជនពិការ ដល់ប្រជាពលរដ្ឋទាំង ៨ក្រុង ស្រុក ទូទាំងខេត្តកំពង់ឆ្នាំងផងដែរ ។
ក្នុងឱកាសនោះ លោក យិន សាវ៉េន អភិបាលក្រុងកំពង់ឆ្នាំង បានសម្តែងនូវការកោតសរសើរ ចំពោះសាខាមូលនិធិជនពិការ និងមន្ទីរសង្គមកិច្ច អតីតយុទ្ធជន និងយុវនីតិសម្បទាខេត្ត ដែលតែងការយកចិត្តទុកដាក់ចំពោះជនពិការ ដែលជួបកាលំបាក ខ្វះខាត ដើម្បីអោយពួកគាត់កាន់តែមានជីវភាពប្រសើរឡើង ថែមទៀត និង ដើម្បីជួយសម្រួលដល់ការលំបាកដល់ក្រុមគ្រួសាររបស់គាត់បន្ថែមទៀតផងដែរ ។ តាមរយៈ មូលនិធិជនពិការបានលើកកម្ពស់ សុខមាលភាព និង សេចក្តីថ្លៃថ្នូរបស់ជនពិការ។
លោកអភិបាលក្រុងកំពង់ឆ្នាំង ក៏បានជម្រុញអោយមូលនិធិជនពិការ បន្តសកម្មភាព របស់ខ្លួនលើការផ្តល់សេវាស្តាលទ្ធភាពពលកម្ម ដោយបានការខិតខំប្រឹងប្រែង អនុវត្តន៍នូវវិធានការណ៍ ជាច្រើននៅតាមមជ្ឈមណ្ឌល ស្តារលទ្ធភាពពលកម្ម ដោយថែរក្សាអនាម័យ ការប្រើប្រាស់ឧករណ៍ សុវត្ថិភាព និង ខិតបណ្ណអប់រំនានា សំដៅអោយជនពិការ ទទួលបាននូវសេវា ស្តាលទ្ធភាព ពលកម្ម ប្រកបដោយគុណភាព និង សុវត្ថិភាព ។
ក្នុងដំណាក់កាលបច្ចុប្ប្ននេះជនពិការទាំងអស់ ត្រូវថែទាំសុខភាពអោយបានល្អ ពិសេសក្នុងដំណាក់កាលទទួលរងនូវផលប៉ះពាល់នៃជំងឺកូវីដ ១៩ ត្រូវយកចិត្តទុកដាក់អនុវត្តអោយបានម៉ឺងម៉ាត់ នូវវិធានការនានារបស់ក្រសួងសុខាភិបាល ដោយរក្សាគំលាតសង្គម និង ការរក្សាអនាម័យជាប់ជាប្រចាំ។
អំណោយដែលបានចែកជូនដល់ជនមានពិការភាពនាពេលនោះមានអង្ករចំនួន ២៥គីឡូក្រាម, ត្រីខចំនួន២យួរ, ទឹកស៊ីអ៊ីវចំនួន១យួរ, ទឹកត្រីចំនួន១យួរ, អំបិលចំនួន២កញ្ចប់, មីម៉ាម៉ាចំនួន១កេះ និងថវិកាចំនួន១០ម៉ឺនរៀល ៕
