អ្នកភូមិ​ត្រពាំង​បួន ​ក្នុង​ស្រុក​សាម​គ្គី​មាន​ជ័យ ស្ម័គ្រ​ចិត្ត​ដាក់​អំពូល​ភ្លើង​បំភ្លឺ​តាម​ដង​ផ្លូវមុ​ខ​ផ្ទះ ដើម្បី​លើ​ក​សោភ័ណ​ភាព និង​បង្កើន​សុវត្ថិភាព​ក្នុង​ភូមិ

កំពង់ឆ្នាំង៖ ប្រជាពលរដ្ឋភូមិត្រពាំងបួន ស្រុកសាមគ្គីមានជ័យ ខេត្តកំពង់ឆ្នាំង បានស្ម័គ្រចិត្ត​ចូល​រួម​ដាក់​បង្គោល​ភ្លើងបំភ្​លឺតាម​ដងផ្លូវកៅ​ស៊ូនៅមុខផ្ទះរបស់ខ្លួន ដោយចំណាយថវិកាផ្ទាល់ៗខ្លួន ដើម្បីចូលរួមកែលម្អសោភ័ណភាពផ្ទះសម្បែង បង្កើត​ភាពទាក់​ទាញ​ថ្មី និងជួយអោយមានភាពប្រសើរឡើងនៃសុវត្ថិភាពនៅក្នុងភូមិ និងការកាត់បន្ថយគ្រោះថ្នាក់ចរាចរណ៍នាពេលយប់។

លោក វន ស៊ីផា អភិបាលស្រុកសាមគ្គីមានជ័យ បានថ្លែងអំណរគុណ និងសូមកោតសរសើរ​ចំពោះទឹកចិត្តដ៏ល្អ​ប្រពៃរបស់​បង​ប្អូន​ប្រជា​ពលរដ្ឋភូមិត្រពាំងបួន ស្រុកសាមគ្គីមានជ័យ ខេត្តកំពង់ឆ្នាំង ដែលបានស្ម័គ្រ ចិត្តចូលរួមដាក់​បង្គោលភ្លើង​បំភ្លឺតាម​ដង​ផ្លូវ​កៅស៊ូនៅមុខផ្ទះរៀងៗខ្លួនដោយចំណាយថវិកាផ្ទាល់ៗខ្លួន ក្រោមការដឹកនាំដោយ លោក បឿន សុខា មេភូមិត្រពាំងបួន រួម​ជាមួយលោកឣនុប្រធានភូមិ សមាជិកភូមិ និងប្រជាការពារក្នុងភូមិ ហើយលោកអភិបាលស្រុកបានសំណូមពរដល់ លោក បឿន សុខា​ មេភូមិ និងថ្នាក់ដឹកនាំភូមិត្រពាំងបួនទាំងឣស់ ត្រូវបន្តខិតខំបន្ថែមទៀតដើម្បីចូលរួមបម្រើ​ប្រជាពល​រដ្ឋក្នុ​ង​ភូមិឲ្យ​បាន​ល្អ​ប្រ​សើរ និងសកម្មដោយត្រូវយកចិត្តដាក់ខ្ពស់ចំពោះសុខទុក្ខប្រជាពលរដ្ឋ ពិសេសប្រជាពល រដ្ឋ​ដែល​ជួបការលំបាក​នៅក្នុង​មូល​ដ្ឋាន​ដោយមិនមានការរើសឣើងឡើយ។

លោកឣភិបាលស្រុក ក៏បានសំណូម​ពរបន្ថែមទៀតដល់ឣា​ជ្ញាធរឃុំ និងភូមិផ្សេង​ទៀតនៅក្នុងស្រុកសាមគ្គីមា​នជ័យ ត្រូវសិក្សា​ស្វែង​​យល់​រៀនសូត្រចំពោះបទពិសោធន៍នៃការដឹកនាំរបស់លោកមេភូមិត្រពាំងបួន ដើម្បីយកទៅច្នៃបង្កើត​ក្នុងកា​រ​ដឹក​នាំ​អភិវឌ្ឍ​មូលដ្ឋានឃុំ និងភូមិរបស់ខ្លួនបន្ថែមទៀត។

លោកឣភិបាលស្រុក ក៏បានអំពាវនាវឱ្យបងប្អូនប្រជាពលរដ្ឋបន្តចូលរួមទប់ស្កាត់ជម្ងឺកូវីដ១៩ ដោយអនុវត្តនូវវិធាន​ការ​ការពារ​តាមការ​ណែនាំរបស់ក្រសួងសុខាភិបាល ដើម្បីកុំឱ្យឆ្លងដល់គ្រួសារនិង​សហគមន៍​របស់​យើង ៕

ព័ត៌មាន​ទាក់​ទង

ភ្ជាប់ទំនាក់ទំនងជាមួយ វិទ្យុ ម៉ាយអេហ្វអឹម ខេត្តកំពង់ឆ្នាំង