កំពង់ឆ្នាំង ៖ កិច្ចប្រជុំសាមញ្ញលើកទី១៤ អាណត្តិទី៣ របស់ក្រុមប្រឹក្សាខេត្តកំពង់ឆ្នាំង ត្រូវបានធ្វើឡើងកាលពីព្រឹកថ្ងៃទី៣០ ខែកក្កដា ឆ្នាំ២០២០ ដោយបានប្រព្រឹត្តទៅក្រោមអធិបតីភព ឯកឧត្តម ឡុង ឈុនឡៃ ប្រធានក្រុមប្រឹក្សាខេត្តកំពង់ឆ្នាំង និងលោក ហេង ពិទូ អភិបាលរងខេត្តតំណាងឯកឧត្តម ឈួរ ច័ន្ទឌឿន អភិបាលខេត្តកំពង់ឆ្នាំង និង មានការចូលរួមពីសំណាក់ថ្នាក់ដឹកនាំមន្ទីរ មន្រ្តីជំនាញ តាមមន្ទីរអង្គភាពជុំវិញខេត្ត អភិបាល អភិបាលរង ក្រុង ស្រុកទាំង៨ ។ កិច្ចប្រជុំក្រុមប្រឹក្សាខេត្តកំពង់ឆ្នាំង លើកទី១៤នេះ ធ្វើឡើងដើម្បីពិនិត្យនិងឆ្លងរបាយការណ៍សមិទ្ធផលសកម្មភាពការងាររបស់រដ្ឋបាលខេត្ត ដែលបានសម្រេចបាននាខែកន្លងមក និង ទិសដៅការងារសម្រាប់អនុវត្តបន្ត ព្រមទាំងរបៀបវិរ:សំខាន់ៗមួយចំនួនទៀត ។
លោក ហេង ពិទូ អភិបាលរងខេត្តកំពង់ឆ្នាំង បានលើកឡើងថា នៅក្នុងរយៈពេលកន្លងមកនេះខេត្តកំពង់ឆ្នាំង បានជម្រុញការអភិវឌ្ឍន៍លើគ្រប់វិស័យ ដោយធានាបាននូវសន្តិសុខ សុវត្ថិភាពនិងកំណើនសេដ្ឋកិច្ចផងដែរ ។ ដើម្បីចូលរួមអនុវត្តន៍គោលនយោបាយររបស់រាជរដ្ឋាភិបាល ក្នុងដំណាក់កាល នៃស្ថានភាពប្រយុទ្ធប្រឆាំង និងជំងឺកូវីដ១៩នេះ រដ្ឋបាលខេត្តកំពង់ឆ្នាំង បានបំពេញបេសកកម្មយ៉ាងយកចិត្តទុកដាក់ក្នុងការផ្សព្វផ្សាយតាមប្រព័ន្ធផ្សព្វផ្សាយរបស់ជាតិ និងការផ្សព្វផ្សាយដោយផ្ទាល់នៅមូលដ្ឋាន ។ ជាមួយគ្នានេះអាជ្ញាធរមូលដ្ឋាន ក៏បានចុះធ្វើការស្រាវជ្រាវ កំណត់អត្តសញ្ញាណកម្មគ្រួសារក្រីក្រ បានផ្តល់ប័ណ្ណសមធម៌ដល់អាជ្ញាឃុំសង្កាត់ សម្រាប់ផ្តល់ជូនប្រជាពលរដ្ឋដែលជាគ្រួសារក្រីក្រពិតប្រាកដនៅមូលដ្ឋានផងដែរ ។
លោកអភិបាលរងខេត្ត បានបញ្ជាក់ទៀតថា បើទោះបីជាកន្លងមកនៅខេត្តកំពង់ឆ្នាំងមានការអភិវឌ្ឍន៍យ៉ាងណាក៏ដោយ ប៉ុន្តែក៏នៅមានភាពអសកម្មមួយចំនួនដែលបច្ចុប្បន្នខេត្តកំពុងរៀបចំធ្វើការកែលម្អ ដើម្បីអោយការអភិវឌ្ឍន៍កាន់តែមានភាប្រសើរឡើងថែមទៀត ។
ឯកឧត្តម ឡុង ឈុនឡៃ ប្រធានក្រុមប្រឹក្សាខេត្តកំពង់ឆ្នាំង នៅក្នុងកិច្ចប្រជុំនោះ បានសម្តែងនូវការកោតសរសើរ ចំពោះគណអភិបាលខេត្ត មន្រ្តីរាជការគ្រប់លំដាប់ថ្នាក់ ដែលបានរួបរួមគ្នាកសាង និងអភិវឌ្ឍន៍ខេត្ត ដែលធ្វើអោយខេត្តមួយនេះមានការកែប្រែមុខមាត់ថ្មី ទាក់ទាញបានវិយោគគិន មកបណ្តាក់ទុនរកស៊ីនៅក្នុងខេត្ត ធ្វើអោយប្រជាពលរដ្ឋមានជីវភាពប្រសើរឡើង។
ឯកឧត្តម ឡុង ឈុនឡៃ បានមានប្រសាសន៍បញ្ជាក់ថា ដើម្បីឱ្យខេត្តកំពង់ឆ្នាំងកាន់មានការអភិវឌ្ឍន៍បន្ថែមទៀតនោះ មន្ទីរជំនាញ និងអាជ្ញាធរមូលដ្ឋានគ្រប់លំដាប់ថ្នាក់ ត្រៀមចូលរួមដោះស្រាយរាល់បញ្ហាប្រឈមដែលអាចកើតឡើងក្នុងមូលដ្ឋានរបស់ខ្លួន ពិសេសកិច្ចការងារបង្កបង្កើនផលស្រូវ និង បញ្ហាជំងឺ covid 19 ។ មន្ទីរជំនាញពាក់ព័ន្ធ ត្រូវយកចិត្តទុកដាក់លើបញ្ហាប្រឈមខាងលើដោយធ្វើការពិភាក្សា និងដោះស្រាយអោយបានសមស្របនិងទាន់ពេលវេលាផងដែរ ធ្វើយ៉ាងណាកុំអោយបញ្ហប្រឈមទាំងនេះរាំងស្ទះដល់ការអភិវឌ្ឋន៍របស់ខេត្ត ។ អាជ្ញាធរមូលដ្ឋាន បន្ដពង្រឹងគោលនយោបាយភូមិ ឃុំ មានសុវត្ថិភាពដោយខិតខំបម្រើសេវាសាធារណៈ នៅតាមមូលដ្ឋាន ឃុំ សង្កាត់ ធ្វើយ៉ាងណាអោយមានប្រសិទ្ធភាព និង តម្លាភាព ។
នៅក្នុងកិច្ចប្រជុំសាមញ្ញលើកទី១៤ អាណត្តិទី៣ របស់ក្រុមប្រឹក្សាខេត្តនាពេលនេះ បានធ្វើការផ្សព្វផ្សាយសេចក្តីប្រកាសរបស់ក្រសួងមហាផ្ទៃស្តីពីការផ្លាស់ប្តួរនិងទទួលស្គាល់លោកជំទាវប្រាក់ សាកន ជាសមាជិកក្រុមប្រឹក្សាខេត្ត ជំនួស ឯកឧត្តមសាន់ យូរ ដែលត្រូវទទួលភារកិច្ចថ្មី ។
