គ្រាន់តែ​ចាក់​ធុង​​បាស់​(Speaker)​ឮពេក​​ប្រាប់​មិន​ស្តាប់​ ទាញ​ចប​ជីក​ទៅវាយ​បែកក្បាល​និង​របួសដៃ

កំពង់ឆ្នាំង ៖ បុរសចំណាស់ម្នាក់បានរងរបួសបែកក្បាលនិងដៃធ្ងន់ធ្ងរ ត្រូវគេដឹកយក​មកសង្រ្គោះ​នៅមន្ទីរពេទ្យបង្អែក​ខេត្ត​កំពង់​ឆ្នាំង ដោយសារជនដៃខឹងចាក់ធុងបាស់ឮសម្លេងខ្លាំងៗ និយាយមិនស្តាប់ ក៏លីចបជីកទៅវ៉ៃដល់ផ្ទះតែម្តង ។ករណី​ផ្ទុះហឹង្សា​ដាក់​គ្នាដោយសារតែរឿងចាក់ធុងបាស់នេះ បានកើតឡើងកាលពីវេលា១២ថ្ងៃត្រង់ទី១៧ ខែកុម្ភៈ ឆ្នាំ២០២០ នៅ​សង្កាត់ខ្សាម ក្រុងកំពង់ឆ្នាំង ខេត្តកំពង់ឆ្នាំង ។

សមត្ថកិច្ចបានអោយដឹងថា ជនដៃដល់ឈ្មោះលី ចាន់ផល្លា ភេទប្រុស អាយុ៣២ឆ្នាំ មានទីលំនៅ​ភូមិទី៣ សង្កាត់ខ្សាម ក្រុង​កំពង់​ឆ្នាំង ចំណែកឯកជនរងគ្រោះឈ្មោះឌី ភេទប្រុសអាយុ៦៤ឆ្នាំ រស់នៅភូមិឃុំជាមួយគ្នា។

សមត្ថកិច្ចបានអោយដឹងថា នៅមុនពេលកើតហេតុ ជនរងគ្រោះបាននាំគ្នាផឹកស៊ីនិងបានចាក់ធុងបាស់កំដរផងដែរ។ ពេល​នោះ​​ជនដៃដល់បានប្រាប់កុំអោយបើកសម្លេងឮខ្លាំងពេករំខានដល់គេជិតខាង ដេកពួន ។ តែជនរងគ្រោះនៅតែមិនស្តាប់ រឹត​តែ​បើកសម្លេងឮដដែល ដោយទ្រាំមិនបានជនដៃដល់បានលីចបជីកចូលវាយសំពងជនរងគ្រោះដល់ផ្ទះបណ្តាល​អោយត្រូវ​ចំក្បាល​បណ្តាលអោយបែកហូរឈាមស្រោចពេញខ្លួន និង រងរបួសដៃយ៉ាងធ្ងន់ធ្ងរ។

ក្រោយពេលកើតហេតុជនដៃដល់បានរត់គេចខ្លួនបាត់១ថ្ងៃ ទើបនៅថ្ងៃទី១៨ កុម្ភ: នេះសមត្ថកិច្ចឃាត់ខ្លួនបាន យកមកកាន់​អធិ​ការដ្ឋាន​នគរបាលក្រុងកំពង់ឆ្នាំង បានកសាងសំណុំរឿងបញ្ជូនទៅស្នងការដ្ឋាននគរបាលខេត្ត ចាត់ការបន្តទៅតាមនីតិវិធី ។

ព័ត៌មាន​ទាក់​ទង

ភ្ជាប់ទំនាក់ទំនងជាមួយ វិទ្យុ ម៉ាយអេហ្វអឹម ខេត្តកំពង់ឆ្នាំង