លោកឧត្តមសេនីយ៍ទោ ខូវ លី ស្នងការ នៃស្នងការដ្ឋាននគរបាលខេត្តកំពង់ឆ្នាំង នៅថ្ងៃទី២០ ខែកក្កដា ឆ្នាំ២០២០បានអញ្ជើញជាអធិបតីភាពក្នុងពិធីបិទវគ្គបណ្តុះបណ្តាល និង ប្រគល់ភារកិច្ចជូនមន្ត្រីនគរបាលជាតិក្របខ័ណ្ឌឆ្នាំ២០១៩ចំនួន១០០នាក់ នៅស្នងការដ្ឋាននគរបាលខេត្តកំពង់ឆ្នាំង ។
នៅក្នុងពិធីនោះ លោកឧត្តមសេនីយ៍ទោ ខូវ លី ស្នងការ នៃស្នងការដ្ឋាននគរបាលខេត្តកំពង់ឆ្នាំង បានផ្តាំផ្ញើដល់មន្ត្រីថ្មីដែលនឹងត្រូវប្រគល់ភារកិច្ចជូនទាំងអស់ ត្រូវតែខិតខំបំពេញភារកិច្ចទៅតាមជំនាញដែលថ្នាក់លើប្រគល់ជូន ប្រចាំការ២៤ម៉ោង លើ២៤ម៉ោង ចេញល្បាតចល័តជាប្រចាំ និងផ្តល់សេវាសាធារណៈជូនប្រជាពលរដ្ឋឲ្យបានទាន់ពេលវេលាបន្តការចុះផ្សព្វផ្សាយអំពីផលប៉ះពាល់នៃគ្រឿងញៀន ស្រាវជ្រាវរកមុខសញ្ញាជួញដូរ ប្រើប្រាស់ គ្រឿងញៀន ដើម្បីកាត់បន្ថយបទល្មើសអំពើលួច ឆក់ ប្លន់ ក្មេងទំនើង ក្នុងមូលដ្ឋានស្របតាមគោលនយោបាយភូមិ ឃុំ មានសុវត្ថិភាព។
ជាមួយគ្នានោះ លោកឧត្តមសេនីយ៍ទោ ក៏បានណែនាំ អោយបន្តចុះអនុវត្តន៍រឹតបន្តឹងច្បាប់ចរាចរណ៍ផ្លូវគោក តាមអនុក្រឹត្យលេខ៣៩ថ្មី និងវិធានការបង្ការ ទប់ស្កាត់ការឆ្លងរីករាលដាលជំងឺ COVID-19 ដើម្បីចូលរួមបង្ការទប់ស្កាត់ការរីករាលដាល និងកាត់បន្ថយការឆ្លងជំងឺ COVID-19 សំដៅការពារដល់សុខមាលភាពមន្រ្តីនគរបាល ត្រូវធ្វើអនាម័យឲ្យបានខ្ជាប់ខ្ជួនដោយលាងដៃដោយសាប៊ូ ឬទឹកអាល់កុល មុនចូលធ្វេីការផងដែរ៕
