កំពង់ឆ្នាំង ៖ អំណោយជាស្បៀង និងថវិកា ដែលជាការចូលរួមរបស់ក្រុមការងាររាដ្ឋាភិបាលចុះស្រុកជលគិរី បាននាំយកទៅចែកជូនដល់ប្រជាពលរដ្ឋ ងាយរងគ្រោះចំនួន៣០គ្រួសារ មកពីភូមិចំនួន៣ ក្នុងឃុំជលសារ ស្រុកជលគិរី នាព្រឹកថ្ងៃទី១៤ ខែកក្កដា ឆ្នាំ២០២០ ក្រោមអធិបតីភាព លោក ហៃ មនោរម្យ អភិបាលស្រុកជលគិរី និងលោក លោកស្រី ជាក្រុមការងាររាជរដ្ឋាភិបាលចុះស្រុកគិរី ផងដែរ ។
លោក ហៃ មនោរម្យ អភិបាលស្រុកជលគិរី បានបញ្ជាក់ថា ដើម្បីចូលរួមកាត់បន្ថយការលំបាករបស់ប្រជាពលរដ្ឋ ក្នុងដំណាក់កាល នៃការរាតត្បាតជំងឺកូវីដ១៩នេះ ក្រុមការងាររាជរដ្ឋាភិបាលចុះស្រុកជលគិរី បានរួមសាមគ្គីគ្នា ក្នុងសកម្មភាពមនុស្សធម៌ ជួយដល់ប្រជាពលរដ្ឋ ដែលងាយរងគ្រោះទទួលរងនូវផលប៉ះពាល់ នៃជំងឺកូវីដ១៩ ដែលសកម្មភាពនេះ បានបង្ហាញពីការយកចិត្តទុកដាក់របស់ថ្នាក់ដឹកនាំ ក្រុមការងាររាជរដ្ឋាភិបាល ចុះមូលដ្ឋានស្រុកជលគិរី មកលើប្រជាពលរដ្ឋដែលខ្វះខាតក្នុងជីវភាព ដោយមិនអោយគ្រួសារណាម្នាក់រងគ្រោះដោយសារ កត្តាជីវភាពជាដាច់ខាត ។
លោកអភិបាលស្រុក ក៏បានផ្តាំផ្ញើរ ដល់ប្រជាពលរដ្ឋទាំងអស់ត្រូវចូលរួម ថែរក្សាសុខភាពជាប្រចាំ ពិសេស គឺអនុវត្តអោយបានត្រឹមត្រូវតាមការណែនាំរបស់ក្រសួងសុខាភិបាល គឹត្រូវពាក់ម៉ាស់ លាងសម្អាតដៃ ជាមួយសាប៊ូ អាល់កុល និង ជែល អោយបានញឹកញាប់ និងរក្សានៅគម្លាតអោយឆ្ងាយពីគ្នា និង ត្រូវចូលរួមទប់ស្កាត់កុំអោយមានការរីករាលដាលនៃជំងឺកូវីដ១៩នេះ ដល់សហគមន៍ និង ក្រុមគ្រួសារ ។ បើមានការសង្ស័យត្រូវរាយការណ៍មកអាជ្ញាធរ ឬ គ្រូពេទ្យដែលនៅជិត ដើម្បីជួយអន្តរាគមន៍ពិនិត្យ និងព្យាបាលអោយបានទាន់ពេលវេលា ។
លោក ហៃ មនោរម្យ អភិបាលស្រុកជលគិរី បានអោយដឹងថា ប្រជាពលរដ្ឋដែលជួបការលំបាក និងងាយរងគ្រោះនេះ មកពីភូមិចំនួន៣ គឺភូមិព្រែកទ្រព្យ ភូមិកំពង់បាស្រូវ និង ភូមិកំពង់បាស្រូវត្បូង ឃុំជលសា សរុបចំនួន៣០គ្រួសារ ក្នុងមួយគ្រួសារទទួលបានអង្ករ១០គីឡូក្រាម មី១កេស ទឹកត្រី១យួរ ទឹកស៊ីអ៊ី១យួរ និង ថវិកា១ម៉ឺនរៀល ៕
