សម្តេច​តេជោ​ ហ៊ុន ​សែន បន្ត​អំពាវនាវ​ឱ្យ​​​ពលរដ្ឋ​ខ្មែរ​​កុំ​ធ្វេស​​ប្រហែស​ និង​ថែរក្សា​សុខភាព​ឱ្យបានល្អ កុំឱ្យឆ្លង​ជំងឺ​កូវីដ-​១៩

សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា នៅថ្ងៃទី១២ ខែកក្កដា ឆ្នាំ២០២០នេះ បានបន្តអំពាវនាវ​ដល់ពលរដ្ឋខ្មែរ​ទាំងអស់ កុំឱ្យ​មាន​ការ​ធ្វេស​​ប្រហែស​ឱ្យសោះ ក្រោយមានករណីនាំចូលជំងឺកូវីដ១៩ ពីប្រទេសអា​រ៉ាប៊ីសាអូឌីតចំនួន​១៥​នាក់ទៀត។

ក្នុងខ្លឹមសារនៅលើទំព័រfacebook នៅព្រឹកថ្ងៃទី១២ ខែកក្កដានេះ  សម្តេចតេជោ ហ៊ុន សែន បានលើកឡើងថា សំខាន់នៅពេលនេះ សូមបងប្អូន​បន្តយក​ចិត្តទុកដាក់ថែរក្សាសុខភាពអោយបានល្អ កុំអោយឆ្លងជំងឺកូវីដ-១៩ អោយសោះ។ ថ្មីៗនេះកម្ពុជាយើងមានអ្នក​ដំណើរ​​មក​ពីប្រទេស​អារ៉ាប៊ី​សា​អូឌី ១៥ នាក់ទៀត ដែលមាន​​ឆ្លងមេរោគកូវីដ-១៩ ដែល​កំពុងដាក់​អោយ​ព្យា​បាល​​ជា​បន្ទាន់។ មកទល់​ពេលនេះ​ នៅ​ក្នុងប្រទេស​យើង​គឺមាន​អ្នក​ឆ្លងកូវីដ-១៩ សរុបចំនួន ១៥៦ នាក់ ដែលបានព្យាបាលជាសះ​ស្បើយ ១៣៣នាក់។ ជំងឺកូវីដ-១៩ គឺនៅតែ​ជាជំងឺឆ្លង​រាតត្បាត​ដ៏​កាច​សាហាវ ហើយពុំទាន់​មាន​ថ្នាំព្យាបាលនៅឡើយទេ។

សម្តេចតេជោ បានសូមបងប្អូនប្រជាពលរដ្ឋកុំធ្វេសប្រហែសអោយសោះ ហើយសូមឧស្សាហ៍ដុសលាងសម្អាតដៃជាមួយសាប៊ូ ចែល ឬទឹក​អាល់​​កុល ហើយពាក់​ម៉ាស​​ការពារអោយបានត្រឹមត្រូវ។ ទីកន្លែងដែលមានមនុស្សច្រើនដូចជាទីផ្សារ និង ផ្សារទំនើប តូបលក់ដូរទូទៅ ភោជ​នីយដ្ឋាន ផ្ទះសំណាក់ សណ្ឋាគារ កាស៊ីណូដែល​ទទួល​បាន​ការអនុញ្ញាត្តិ​អោយ​បើកដំណើរការ ជាពិសេស​មន្ទីពេទ្យឯកជន និងមន្ទីរ​ពេទ្យរដ្ឋ​ត្រូវតែ​មាន​ទឹកអាល់កុល ចែ​លសម្លាប់​មេរោគ និងម៉ាស សម្រាប់​​អតិថិជន រួមទាំង​អ្នកជំងឺ នឹងបង​ប្អូនមក​សួរសុខ​ទុក្ខពាក់​ការពារចៀស​វាងការឆ្លងរោគ​ពីម្នាក់​ទៅម្នាក់ ។​
ជាមួយគ្នានោះ សម្តេចតេជោ ក៏​សូមបងប្អូនប្រជាពលរដ្ឋបន្តធ្វើតាម​ការណែនាំ​របស់ក្រសួងសខាភិបាល​អោយបាន​ខ្ជាប់ខ្ជួន និង​​ជូនពរ​ដល់​បងប្អូន​ធ្វើ​ដំណើរមានសុខសុវត្ថិភាព នឹង​ចៀសផុតពីជំងឺឆ្លងកូវីដ-១៩ទាំង​អស់គ្នា។

ព័ត៌មាន​ទាក់​ទង

ភ្ជាប់ទំនាក់ទំនងជាមួយ វិទ្យុ ម៉ាយអេហ្វអឹម ខេត្តកំពង់ឆ្នាំង