នៅព្រឹកថ្ងៃទី២៦ ខែមិថុនា ឆ្នាំ២០២០ កាកបាទក្រហមកម្ពុជា បានផ្ដល់អាវពោងសុវត្ថិភាពចំនួន១០.០០០អាវ ដល់កងទ័ពជើងគោក ដើម្បីត្រៀមប្រើប្រាស់ក្នុងប្រតិបត្តិការសង្គ្រោះផ្សេងៗ។
ក្នុងឱកាសប្រគល់ទទួលសម្ភារៈនេះ លោកជំទាវ ម៉ែន នារីសោភ័គ អគ្គលេខាធិការរងទី១ នៃកាកបាទក្រហមកម្ពុជា ក្នុងនាមជំនួសមុខជូនសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា បានមានប្រសាសន៍កោតសរសើរ និងថ្លែងអំណរគុណដល់កងទ័ពដែលជានិច្ចកាលបានចូលរួមចំណែកយ៉ាងសកម្មក្នុងការងារជួយសង្គ្រោះគ្រោះមហន្តរាយ និងកិច្ចមនុស្សធម៌ ហើយអាវពោងសុវត្ថិភាពដែលផ្តល់ជូននេះ នឹងត្រៀមប្រើប្រាស់ក្នុងប្រតិបត្តិការសង្គ្រោះ ជាពិសេសនៅក្នុងរដូវវស្សាដែលអាចប្រឈមនឹងទឹកឡើងក្នុងឆ្នាំនេះ។
ឧត្តមសេនីយ៍ឯក ចាន់ នន់វិទ្យា មេបញ្ជាការរងកងទ័ពជើងគោក ជំនួសមុខជូន ឯកឧត្តម ឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរង នៃកងយោធពលខេមរភូមិន្ទ មេបញ្ជាការកងទ័ពជើងគោក បានគោរពថ្លែងអំណរគុណចំពោះអំណោយដ៏ថ្លៃថ្លារបស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា។
គួរបញ្ជាក់ថា ក្រៅពីកិច្ចការពារជាតិ យោធិននៃកងយោធពលខេមរភូមិន្ទ តែងតែបានចូលរួមចំណែកជានិច្ចនៅក្នុងសកម្មភាពមនុស្សធម៌ ក៏ដូចជាការងារជួយសង្គ្រោះអាយុជីវិតប្រជាពលរដ្ឋក្នុងឧបទ្ទវហេតុ និងគ្រោះធម្មជាតិផ្សេងៗជាប់ជាប្រចាំ៕
