គ្រឿងញៀនចម្រុះ សារធាតុគីមីផ្សំ និងសារធាតុពាក់ព័ន្ធទម្ងន់សរុបជិត៥០០គីឡូក្រាម ត្រូវបានដុតបំផ្លាញចោល ក្នុងទិវាអន្តរជាតិប្រយុទ្ធប្រឆាំងគ្រឿងញៀន នៅមជ្ឍមណ្ឌលសន្និបាតនិងពិព័ណ៍កោះពេជ្រ នាព្រឹកថ្ងៃទី២៦ មិថុនានេះ។
ក្នុងឳកាសអញ្ជើញជាអធិបតីភាពក្នុងទិវាអន្តរជាតិប្រយុទ្ធប្រឆាំងគ្រឿងញៀន ឆ្នាំ២០២០នេះ ឯកឧត្តម នាយឧត្តមសេនីយ៍ កែ គឹមយ៉ាន ឧបនាយករដ្ឋមន្រ្តី និងជាប្រធានអាជ្ញាធរជាតិប្រយុទ្ធប្រឆាំងគ្រឿងញៀន បានបញ្ជាក់ថា គ្រឿងញៀនដែលដុតបំផ្លាញចោលនេះគឺរឹបអូសបានពីក្រុមឧក្រិដ្ឋជន ក្នុងរាជធានីនិងខេត្តចំនួន៤ រួមមាន រាជធានីភ្នំពេញ ខេត្តកណ្តាល ខេត្តតាកែវ និងខេត្តកំពង់ស្ពឺ។
ឯកឧត្តម នាយឧត្តមសេនីយ៍ បានបន្តថា គ្រឿងញៀនជាច្រើនដែលត្រូវដុតបំផ្លាញនេះ ជាសារមួយបញ្ជូនដល់ឧក្រិដ្ឋជនគ្រឿងញៀនឱ្យឃើញពីឆន្ទះមុតមាំរបស់រាជរដ្ឋាភិបាលកម្ពុជា ក្នុងការបង្រ្កាបគ្រឿងញៀន។ ហើយមិនត្រឹមតែការចាប់គ្រឿងញៀននឹងបំផ្លាញចោលនោះទេ តែមន្រ្តីអនុវត្តច្បាប់នឹងបន្តស្វែងរកប្រភពមូលនិធិទ្រពសម្បត្តិឧក្រិដ្ឋជនទាំងនោះដើម្បីធ្វើការរឹបអូស ឈានទៅកាត់ផ្តាច់ទាំងស្រុងនូវចលករនានា ដែល បម្រើឱ្យសកម្មភាពខុសច្បាប់នៅក្នុងសង្គម។
សូមជម្រាបថា តាមរបាយការណ៍របស់អាជ្ញាធរជាតិប្រយុទ្ធប្រឆាំងគ្រឿងញៀន បានបង្ហាញថា ក្នុងរយៈពេល៥ខែ ដើមឆ្នាំ២០២០នេះ ពោលគឺគិតចាប់ពីថ្ងៃទី១ ខែមករា ដល់ថ្ងៃទី៣១ ខែឧសភា សមត្ថកិច្ចបង្ក្រាបបទល្មើសពាក់ព័ន្ធនឹងគ្រឿងញៀនបានជាង៤ពាន់ករណី ឃាត់ខ្លួនជនសង្ស័យបានជិត៩ពាន់នាក់ និងរឹបអូសគ្រឿងញៀនបានជាង២០០គីឡូក្រាម ។
ដោយឡែកចំពោះ ការផ្តល់ការព្យាបាល និងស្តារនីតិសម្បទាអ្នកញៀនគ្រឿងញៀន អាជ្ញាធរជាតិប្រយុទ្ធប្រឆាំងគ្រឿងញៀន បានគ្រប់គ្រងអ្នកប្រើប្រាស់ និងអ្នកញៀនគ្រឿងញៀនចំនួនប្រមាណ១ម៉ឺននាក់៕
