កំពង់ឆ្នាំង ៖ នាព្រឹកថ្ងៃទី១១ ខែមិថុនា ឆ្នាំ២០២០ ខណ្ឌរដ្ឋបាលព្រៃឈើកំពង់ឆ្នាំងដឹកនាំដោយលោកថោង វាន់វីរ៉ាវុឌ្ឍី បានយកដើមឈើទៅដាំបន្ថែមនៅបរិវេណសួនសម្តេចចៅហ្វាវាំងគង់ សំអុល ស្ថិតក្បែរមជ្ឈមណ្ឌលហ្វឹកហ្វឺនស៊ីម៉ាក់ ក្នុងភូមិម៉ុងបារាំហ សង្កាត់ប្អេរ ក្រុងកំពង់ឆ្នាំង ។
ដើមឈើដែលបានយកទៅដាំនៅទីនោះ ជាប្រភេទឈើផ្កាលម្អ ដើម្បីលើកកម្ពស់សោភ័ណភាពក្រុងកំពង់ឆ្នាំង ឱ្យកាន់តែស្រស់បំព្រងថែមទៀត។
គួរំលឹកថា សួនច្បារសម្តេចចៅហ្វាវាំង គង់ សំអុល ត្រូវបានដាក់សម្ពោធអោយប្រើប្រាស់ជាផ្លូវការនៅព្រឹកថ្ងៃទី០៧ ខែមករា ឆ្នាំ២០២០ ក្រោមអធិបតីភាពសម្តេចចៅហ្វាវាំង វរវៀងជ័យ អធិបតីស្រឹង្គារគង់ សំអុល ឧបនាយករដ្ឋមន្ត្រី និង រដ្ឋមន្ត្រីក្រសួងព្រះបរមរាជវាំង ។
សួនច្បារថ្មីនេះ មានរាងជាត្រីកោណ និងមានថ្នល់កៅស៊ូព័ទ្ធជុំវិញ ។ សួននេះក៏មានចាក់បេតុងដែលជាកន្លែងសម្រាប់ចតរថយន្ត បំពាក់សម្ភារៈក្មេងលេង និងក្រាលថ្មក្រានីត សម្រាប់ប្រជាពលរដ្ឋដើរហាត់ប្រាណ និងដើរកម្សាន្ត ជាដើម ។
ជាមួយគ្នានោះ ផ្នែកខាងក្នុងគឺមានការដាំដើមឈើ ដាំផ្កា និងដាំស្មៅធ្វើជាសួន ចំណែកឯនៅចំណុចកណ្ដាល នៃសួនក៏បានសាងសង់បុស្បុក យ៉ាងធំមួយផងដែរ៕
