គ្រូ​​បង្រៀន​​៣​នាក់ ​និង​វិទ្យា​ល័យ​មួយ​នៅ​ខេត្តកំពង់​ឆ្នាំង ទទួល​​បាន​ជ័យ​លាភី​​ពាន​រ​ង្វាន់​​សម្ដេច​ ហ៊ុន សែន ​​​​ឆ្នាំ​សិក្សា​២០​១៨-​២០១៩​

កំ​ព​ង់​ឆ្នាំង៖ លោក​គ្រូ​អ្នក​គ្រូ​​៣រូប និង វិទ្យាល័យ​មួយ​ក្នុង​ខេត្តកំពង់​ឆ្នាំង​ ទទួល​​​បានជ័​យ​​លា​ភី​​​ពាន​​រង្វាន់​​សម្ដេច​ ហ៊ុន​ សែន​ ឆ្នាំ​​សិ​ក្សា​​២០១៨​-២០១៩។ ពិធី​​ប្រគល់​ពាន​​រង្វាន់​នេះ បាន​ប្រព្រឹត្ត​ទៅ​​ក្រោម​​អធិបតី​ភាព​ ឯកឧត្ដម​បណ្ឌិត​សភាចារ្យ ហង់​ជួន ណា​រ៉ុន ​រដ្ឋមន្ត្រី​​ក្រសួង​​អប់​រំ យុវ​ជន និង​​កីឡា កាល​ពីរ​សៀល​ថ្ងៃទី​០៤ ខែ​មិថុនា ​ឆ្នាំ២០​២០​។

ឯកឧត្ដម​បណ្ឌិត​សភាចារ្យ ហង់​ជួន ណារ៉ុន បាន​បញ្ជាក់​ថា ការ​ផ្តល់​ពាន​រង្វាន់​នេះ ​​ជា​ការ​​លើក​​​ទឹក​​ចិត្ត​​ដែល​​​បាន​​ខិត​ខំ​ប្រឹង​​ប្រែង​​​ក្នុង​ការ​​បំពេញ​​ភារកិច្ច​ការងារ​​យ៉ាង​​អស់​​ពី​កម្លាំង​​កាយ​ចិត្ត ដែល​​ការ​​ខិតខំ​ប្រឹង​ប្រែង​​ទាំង​នោះ​​ចូលរួម​​ចំណែក​​​ក្នុង​​ការ​លើក​​កម្ពស់​គុណ​ភាព​​អប់រំ​​នៅ​កម្ពុជា​។

ឯកឧត្តម រដ្ឋមន្រ្តី ក៏បានធ្វើការវាយតម្លៃខ្ពស់ ចំពោះកិច្ចខិតខំប្រឹងប្រែងរបស់បុគ្គលិក​សិក្សា​គ្រូបង្រៀន​ទាំងអស់​នៅខេត្ត​កំព​ង់​​ឆ្នាំង​​ដែលព្យាយាមយកអស់ពីកម្លាំងកាយចិត្ត​ដើម្បី​ចូលរួម​កែខៃគុណភាពអប់រំបានល្អ ។ ជា​ពិសេ​ស​បើគ្មាន​ការទំនាក់​ទំនង​រវាង​គ្រូ និង​សិស្សទេនោះ ប្រសិទ្ធភាពនៃការបង្រៀនក៏មិនមានជា​លក្ខណៈពេញលេញ​នោះដែរ។

ជាមួយគ្នានោះ លោក ស៊ឹម ប្រឹម ប្រធានមន្ទីរអប់រំយុវជននិងកីឡាខេត្តកំពង់ឆ្នាំង ក៏បាន​បញ្ជាក់​ដែរថា តាំងពីឆ្នាំ២០១៤ រហូត​មក​ដល់ឆ្នាំ​២០១៩​គ្រូបង្រៀន​​នៅ​ខេត្តកំពង់​ឆ្នាំង​តែងតែ​បានទទួលចំណាត់​ថ្នាក់ជ័យលាភី​ជាគ្រូបង្រៀន​ល្អ និង សាលា​​រៀន​ស្អាត ដោយ​​បាន​​​ទទួលពានរង្វាន់សម្តេចហ៊ុន សែន ជាបន្តបន្ទាប់ផងដែរ ។ បច្ចុប្បន្នដោយសារស្ថានភាពនៃជំងឺ កូវីដ១៩ មន្ទីរ​អប់រំយុវជននិងកីឡាខេត្តបានជម្រុញ និងរៀបចំប្រព័ន្ធ​​ការងារ​សិក្សា​ពីចម្ងាយ​​នៅ​គ្រប់មូលដ្ឋាន​សិក្សា បាន​ជាង​៦០​ភាគ​រយ​នៅទូទាំងខេត្ត ។

សូម​ជម្រាប​ថា ​​​ជ័យ​លាភី​ទាំង​៤ដែល​ទទួល​ពាន​រង្វាន់​​សម្តេច​តេជោ​ហ៊ុន​សែន រួម​មាន​ ពាន​រង្វាន់​​គ្រូ​បង្រៀន​​ល្អ​ ភាសា​​ខ្មែរ​ថ្នាក់​ទី១-៣ ចំណាត់​ថ្នាក់​​លេខ​៣ គ្រូ​បង្រៀន​​ល្អ​គណិត​វិទ្យា ថ្នាក់​ទី​១-៣ ចំណាត់​​ថ្នាក់​លេខ​២ និង​ពាន​រង្វាន់​សាលា​រៀន​ស្អាត ចំណាត់​ថ្នាក់​​លេខ​៤ ។ ក្រៅពីផ្តល់ពាន​រង្វាន់​​សម្ដេច ហ៊ុន សែនដល់ជ័យ​លាភី​​ទាំង៤ខាង​លើ  ឯកឧត្ដម​ ​រដ្ឋមន្ត្រី​ក្រសួង​អប់រំ យុវជន និង​កីឡា ​ក៏បានផ្តល់ប័ណ្ណ​សរសើរ​​ដល់គ្រូបង្រៀនចំនួន​​៦​​នាក់ផ្សេ​ង​ទៀត​ផងដែរ៕

ព័ត៌មាន​ទាក់​ទង

ភ្ជាប់ទំនាក់ទំនងជាមួយ វិទ្យុ ម៉ាយអេហ្វអឹម ខេត្តកំពង់ឆ្នាំង