រយៈពេលមួយឆ្នាំពេញ២០១៩ លេជេនដែលមានព្រឹត្តិការណ៍ភាពយន្តប្រចាំឆ្នាំ Movie Of The Year 2019 បានរកឃើញជ័យលាភីភាពយន្ត និងតារាសម្តែងឆ្នើម ប្រចាំឆ្នាំ២០១៩ហើយ កាលពីថ្ងៃទី២៦ ខែធ្នូ ឆ្នាំ២០១៩នៅរោងភាពយន្ត លេជេន អេដេន(Legend Eden) ក្រោមវត្ត មានមន្ត្រីក្រសួងវប្បធម៌ និងវិចិត្រសិល្បៈ សិល្បករ ផលិតករ ជាច្រើនចូលរួម។
ក្នុងព្រឹត្តិការណ៍ភាពយន្តប្រចាំឆ្នាំ Movie Of The Year 2019នេះ តារាសម្តែងស្រីឆ្នើម ប្រចាំឆ្នាំបានទៅលើតារាសម្តែងស្រី យ៉ែម ស្រីពេជ្រ ដែលចូលរួមសម្តែងក្នុងភាពយន្តរឿង ”នាឡិកាដាស់វិញ្ញាណ” របស់ផលិតកម្ម LD Picture ខណៈតារាសម្តែង ប្រុសឆ្នើមបានទៅលើលោក រ៉ុង សុភាដេវីដ ក្នុងភាពយន្តរឿង”ស្នេហាក្មេងៗ “ របស់ផលិតកម្មកងចក្រ ។
កញ្ញា យ៉ែម ស្រីពេជ្រ ដែលទទួលពានរង្វាន់សម្រាប់ឆ្នាំ២០១៩នេះ បាននិយាយទាំងរំភើបថា ដោយសារនាងមានក្តីស្រមៃចង់បានពានរង្វាន់តារាឆ្នើមនេះជាយូណាស់មកហើយ។ នាងបានថា នេះបានឆ្លុះបញ្ចាំងពីការខិតខំក្នុងការងារសិល្បៈអស់រយៈពេល៤ឆ្នាំនេះ។ នាងក៏បានអរគុណ ដល់រោងភាពយន្ត លេជេន ដែលបានបង្កើតកម្មវិធីមួយនេះ និងអរគុណអ្នកគាំទ្រ ផលិតករ សិល្បកររៀមច្បង ដែលបានជំរុញលើក ទឹក ចិត្តនាងកន្លងមក។
គួរបញ្ជាក់ថា នេះគឺជាលើកទី៤ ហើយដែល លេជេន បង្កើតព្រឹត្តិការណ៍ភាពយន្តប្រចាំឆ្នាំដូចគ្នានេះឡើង។ គោលបំណងនៃការបង្កើតកម្មវីធី នេះ ដើម្បីចូលរួមចំណែកជួយលើកកម្ពស់ភាពយន្តខ្មែរក៏ដូចជាគាំទ្រ លើកទឹកចិត្តដល់សិល្បករខ្មែរផងដែរ៕ អត្ថបទ៖ សុគន្ធារី
