រូបភាពស៊ិចស៊ីមួយប្លង់ នៅតែត្រូវបានគេយកមករំលេច ក្នុងបំណងវាយប្រហារលើតារាហ្វេសប៊ុក ដែលជាម្ចាស់ផេក Siv Mey Online Shop ថាបានយកម៉ោងផ្សាយលក់ផលិតផល បញ្ចេញភាពស្រើបស្រាល បើទោះជារូបភាពនោះ គឺជាប្លង់មួយក្នុងម៉ោងLive ដែលមិនមែនជារឿងមិនសមហេតុផល។ មនុស្សជាច្រើនបានគិតថាជាការផ្ចាញ់ផ្ចាល បញ្ឆេះរូបភាពមួយប្លង់នោះ ដើម្បីអោយមានការរិះគន់រូបអ្នកនាង។
បន្ទាប់ពីបណ្តាញសារព័ត៌មានចាប់អារម្មណ៍ច្រើនឡើងពីរឿងរ៉ាវឯកជន និង សកម្មភាពសប្បុរសធម៌ តារាហ្វេសប៊ុក អ្នកនាង សៀវម៉ី ស្រាប់តែត្រូវបានគេលើកយកចំណុចអវិជ្ជមានយកមកវាយប្រហារក្នុងបំណងបំបាក់មុខមាត់របស់អ្នកនាង។ យ៉ាងណាមិញ បន្ទាប់ពីការរិះគន់មិនទាន់បានប៉ុន្មានផង គេឃើញហ្វេនៗរបស់តារារូបនេះ ចេញមុខការពារភ្លាម ដោយបានទាំងលើកយកសកម្មភាពសប្បុរសធម៌របស់អ្នកនាងជាច្រើនយកមករំលេច និងថាអ្វីដែលគេរិះគន់គឺជារឿងកើតចេញពីទំនាស់មុខជំនួញ ក្រោយពេលអ្នកនាង និង ម្ចាស់អនឡាញមួយប៉ះទង្គិចគ្នា។
អ្នកតាមដានវីដេអូ Live របស់អ្នកនាង នៅតែសម្ដែងការហួសចិត្ត ក្នុងពេលដែលមានអ្នកលើកយកមករូបភាពស៊ិចស៊ីមួយប្លង់ ក្នុងពេលដែលអ្នកនាង កំពុង Live លក់ឡេ ហើយយកឡេមកលាបនឹងជើង ហើយ Crop តែចំណុចស៊ិចស៊ីពីវីដេអូ Live មករិះគន់។ ជាមួយគ្នានោះគេឃើញមានអ្នកគាំទ្រជាច្រើនបានចូលផ្ដល់កម្លាំងចិត្ត ខណៈដែលលើហ្វេសប៊ុក ក៏មានការបង្ហោះពីអំពើល្អរបស់អ្នកនាងកន្លងមកផងដែរ។
ទន្ទឹមគ្នានេះហ្វេសប៊ុករបស់មួយដែលគេស្គាល់ថា ជាព្រះចៅអធិការវត្តមួយ បានទាំងរំលេចរូបថតជាង៧០សន្លឹក និងសកម្មភាពសប្បុរសធម៌របស់អ្នកនាង ដើម្បីបង្ហាញអោយដឹងថាអ្នកនាង គឺជាមនុស្សល្អនិងធ្វើអំពើល្អចេញពីចិត្ត៕
