សម្ភារ​​ដាក់​​ការពារ​​សុវត្ថិភាព​​តាម​ការដ្ឋានកែលម្អ​ផ្លូវ​​ជាតិ​​​លេខ​៥​ តែងតែ​​ត្រូវ​បាន​​លួច ​និង​រងការវ៉ៃបំផ្លាញ​នៅពេលយប់

កំពង់ឆ្នាំង៖ មន្ត្រីក្រសួងសាធារណការ និងដឹកជញ្ជូន និងមន្ត្រីគ្រប់គ្រងគម្រោងរបស់ក្រុមហ៊ុនដែលទទួល​កែលម្អកំណាត់​ផ្លូវ​ជាតិ​​លេខ​៥ ផ្នែកខាងត្បូង ពីព្រែកក្តាម ខេត្តកណ្តាល-ទៅធ្លាម្អម ខេត្តពោធិ៍សាត់ បានស្នើសុំដល់ប្រជាពលរដ្ឋ កុំបំផ្លិចបំផ្លាញ និងយក​សម្ភារ​​ការពារសុវត្ថិភាព​ទៅធ្វើ​ជា​កម្មសិទ្ធិ​​ដែលដាក់តាមការដ្ឋាននីមួយៗនៅលើដងផ្លូវ។ ការស្នើសុំនេះធ្វើ​ឡើង​​បន្ទាប់​ពីមាន​សម្ភារៈ​ដាក់ការពារសុវត្ថិភាព​ប្រហែល​ ២០០០ត្រូវបានបាត់ចេញពីតាមទីតាំងការដ្ឋាននានាលើផ្លូវជាតិលេខ៥ ។

លោក Takuji Shigeyama ប្រធានគ្រប់គ្រងគម្រោងសាងសង់ បានបញ្ជាក់ថា ចាប់តាំងពីការអនុវត្តគម្រោង​កែលម្អកំណាត់​ផ្លូវជាតិ​លេខ៥ ក្រុមការងារបច្ចេកទេសជួសជូលកែលម្អផ្លូវ បានជួបប្រទះនូវបញ្ហាប្រឈមមួយចំនួន ដូចជា តំបន់ខ្លះ​ប្រជា​ពលរដ្ឋ​បានជិះយានជំនិះចូលកន្លែងកំពុងស្ថាបនាផ្លូវដែលអាចបង្កឲ្យមានគ្រោះថ្នាក់ និងបង្កជាហ៊ុយដី ខណៈមាន​ប្រជា​ពល​រដ្ឋ​ខ្លះបានយកសម្ភារៈសុវត្ថិភាពទៅដាក់កន្លែងផ្សេងឬដកយកទៅប្រើប្រាស់ផ្ទាល់ខ្លួនជាដើម។


លោក ឌុន វណ្ឌីរីហ្គែន តំណាងនាយកដ្ឋានផ្លូវថ្នល់នៃក្រសួងសាធារណការ និងដឹកជញ្ជូន ក៏បានបញ្ជាក់ដែរថា ក្នុងអំឡុងពេល​អនុវត្ត​គម្រោងជួសជុលកែលម្អកំណាត់ផ្លូវនេះ ក្រុមអ្នកបច្ចេកទេសបានជួបប្រទះនូវប្រឈមមួយចំនួនដែលជា​ឧបសគ្គ​ស​ម្រា​ប់​​​​​​ការសាងសង់ ពេលខ្លះអ្នកជិះម៉ូតូបានវៃបំផ្លាញចោល អំពូលភ្លើងសញ្ញាដែលដាក់ការពារសុវត្ថិភាព។ ករណី​នេះ​លោក​ទ​ទូ​ច​សុំការយោគយល់ពីសំណាក់ប្រជាពលរដ្ឋ ចូលកុំបំផ្លិចបំផ្លាញសម្ភារតាមដងផ្លូវ ដែលជាផលប្រយោជន៍​សាធារ​ណៈ​ ជា​ពិ​សេ​ស​សុវត្ថិភាពតែម្តង។
គួរបញ្ជាក់ថា ការកែលម្អកំណាត់ផ្លូវជាតិលេខ៥ ដែលចំណាយទឹកប្រាក់សរុបប្រមាណ៦០០លានដុល្លារនោះ ចែកចេញជា​៣គម្រោង រួមមាន គម្រោងទី១ លាតសន្ធឹងពីបង្គោលគីឡូម៉ែត្រលេខ២៨២ ខេត្តបាត់ដំបងទៅកាន់គីឡូម៉ែត្រលេខ ៣៦៦ ក្រុង​សិរីសោភណ្ឌ ខេត្តបន្ទាយមានជ័យ គម្រោងទី២ លាតសន្ទឹងពីចំណុចធ្លាម្អម គីឡូម៉ែត្រលេខ១៧១ ខេត្តពោធិ៍សាត់ ដល់​គីឡូ​ម៉ែត្រ​លេខ២៨២ ខេត្តបាត់ដំបង និងគម្រោងទី៣ ចាប់ពីព្រែកក្តាមគីឡូម៉ែត្រលេខ៣១ ខេត្តកណ្តាល ដល់ធ្លាម្អម គីឡូម៉ែត្រ​លេខ​១៧១ ខេត្តពោធិ៍សាត់។ ក្នុងគម្រោងនេះក៏មានការសាងសង់ផ្លូវវៀងក្រុងឧត្តុង្គ និងក្រុងកំពង់ឆ្នាំង ព្រមទាំងមានការសាង​សង់ស្ពាន​ចំនួន២ ជួសជុលស្ពានចាស់១៣កន្លែង និងសាងសង់ស្ពានថ្មីជំនួសស្ពានចាស់១៨កន្លែង រួមនិងការរៀប​ចំ​ហេដ្ឋារចនាសម្ព័ន្ធមួយចំនួនទៀតផងដែរ៕

 

ព័ត៌មាន​ទាក់​ទង

ភ្ជាប់ទំនាក់ទំនងជាមួយ វិទ្យុ ម៉ាយអេហ្វអឹម ខេត្តកំពង់ឆ្នាំង