បណ្ឌិត្យ​សភា​នគរ​បាល​កម្ពុជា ​បង្ហាញ​ឯក​សណ្ឋាន​ថ្មីសម្រាប់​​និស្សិត​​នាយ​នគរបាល​ និង​សិស្ស​នគរ​បាល​ ប្រើ​ក្នុង​ពេល​កំពុង​សិក្សា​

បណ្ឌិត្យសភានគរបាលកម្ពុជា បានប្រកាសផ្សព្វផ្សាយពីការប្រើប្រាស់ឯកសណ្ឋានថ្មី កំណត់អត្ត សញ្ញាណ សម្រាប់​និស្សិត​នាយ​នគរបាល និងសិស្សនគរបាល ដែលកំពុងសិក្សា។ពិធីផ្សព្វផ្សាយអំពីការប្រើឯកសណ្ឋានថ្មី សម្រាប់​និស្សិត​នាយ​នគរ​បាល​ និងសិស្សនគរបាល បានធ្វើឡើងនៅបណ្ឌិត្យសភានគរបាលកម្ពុជា នាព្រឹកថ្ងៃទី២១ កុម្ភៈ​នេះ​។

ឯកឧត្តម នាយឧត្តមសេនីយ៍ សេង ផល្លី ប្រធានបណ្ឌិតសភានគរបាលកម្ពុជា បានបញ្ជាក់ថា ​គោល​បំណង​នៃការ​បង្កើត​ឯក​សណ្ឋាន​ថ្មីនេះ គឺដើម្បីកំណត់អត្តសញ្ញាណ និងពង្រឹងវិន័យអ្នកសិក្សា ផ្តល់ភាពងាយស្រួលក្នុងការគ្រប់គ្រង លើក​កម្ពស់​កិត្យា​នុ​ភាព ឧត្តមភាពរបស់បណ្ឌិត្យសភា និងអាច ប្រៀបធៀប​បានជា​មួយ​ស្ថាប័ន​បណ្តុះ​បណ្តាល​កង​កម្លាំង​នគរបាល​នៃ​ប្រទេស​​នានា ក្នុងក្របខណ្ឌអាស៊ាន និងតំបន់ ជាពិសេសការរៀបចំឯកសណ្ឋានថ្មីនេះ ក៏ស្រប​ទៅ​នឹង​ទិដ្ឋភាព​ច្បាប់ផងដែរ។

ឯកឧត្តម នាយឧត្តមសេនីយ៍ លើកឡើងបន្តថា ការបង្កើតឯកសណ្ឋានថ្មីនេះ ត្រូវបានអនុញ្ញាតអោយប្រើជា​ផ្លូវ​ការ​ដោយ​ប្រ​កា​ស​​​ក្រសួងមហាផ្ទៃដែលសមិទ្ធផលនៃកំណែទម្រង់របស់បណ្ឌិត្យសភានគរបាល ព្រោះអ្នកសិក្សាជំនាន់មុនៗ មិន​មាន​ប្រើ​ឯកសណ្ឋានបែបនេះនោះទេ។ ហើយការបង្កើតឯកសណ្ឋានថ្មី ត្រូវបានចំណាយពេលជិត២ឆ្នាំ ដោយ​មាន​ការ​ស្រាវ​ជ្រាវ​ដក​ស្រង់​បទ​ពិសោធន៍​ពីអន្តរជាតិ​ផងដែរ​។

គួរបញ្ជាក់ថា ឯកសណ្ឋានថ្មីនេះ មានលក្ខណៈទម្រង់ស្រដៀងនឹងឯកសណ្ឋាននគរបាលទូទៅដែរ តែប្លែកនៅលើពណ៌មួក សញ្ញា​លើស្មា និងផ្លាកសញ្ញានានា។ ចំពោះមួក និងសញ្ញាលើស្មា មានពណ៌ ដូចគ្នា ដែលមានអត្ថន័យសម្គាល់ រួមមាន ពណ៌​លឿង​​សម្គាល់សិស្សនគរបាលជាតិ ពណ៌ទឹកក្រូច សម្គាល់និស្សិតថ្នាក់បរិញ្ញាបត្រឆ្នាំទី១ ពណ៌​បៃតង​សម្គាល់​និស្សិតថ្នាក់​បរិញ្ញា​បត្រឆ្នាំទី២ ពណ៌ស្វាយ សម្គាល់និស្សិតថ្នាក់បរិញ្ញាបត្រឆ្នាំទី៣ ពណ៌ខៀវសម្គាល់និស្សិតថ្នាក់បរិញ្ញាបត្រឆ្នាំទី៤  ពណ៌​ត្នោតសម្គាល់​និស្សិតថ្នាក់បរិញ្ញាបត្រជាន់ខ្ពស់ឆ្នាំទី១​ និងពណ៌ក្រហម សម្គាល់និស្សិតថ្នាក់បរិញ្ញាបត្រជាន់ ខ្ពស់ឆ្នាំទី២ ៕

ព័ត៌មាន​ទាក់​ទង

ភ្ជាប់ទំនាក់ទំនងជាមួយ វិទ្យុ ម៉ាយអេហ្វអឹម ខេត្តកំពង់ឆ្នាំង